1701 բանաձեւին եւ միջազգային այլ որոշումներու գործադրութիւնն ու զինեալ կազմակերպութիւններուն՝ ներառեալ Հըզպալլայի ապազինումը լիբանանցիներուն համար կը մնան տարակարծութեան գլխաւոր նիւթեր: Արտաքին գործերու նախարար Եուսէֆ Ռաժի յայտնեց, որ արտաքին ներդրումներու Լիբանան վերադարձն ու պատերազմի հետքերուն վերացումը ունին միջազգային նախապայմաններ՝ ներառեալ միջազգային օրէնքներու գործադրութիւնը՝ յանուն լիբանանեան ներքին կայունութեան եւ խաղաղութեան: «Եթէ կայունութիւն չըլլայ, արաբ եւ օտարազգի ներդրողը պիտի չքաջալերուի գալ Լիբանան, իսկ միջազգային նուիրատու կողմերը օգնութիւն պիտի չցուցաբերեն Լիբանանին», ըսաւ Ռաժի, աւելցնելով որ հանրապետութեան նախագահի ընտրութինն ու վարչապետի նշանակումը դրական նշաններ են, վստահութիւն ներշնչած են օտարազգիներուն, որպէսզի դարձեալ մուտք գործեն լիբանանեան շուկայ: «Լիբանան վճռած է վերատեսութեան ենթարկել Սուրիոյ հետ կնքուած բոլոր համաձայնութիւնները՝ զանոնք բարեփոխելու կամ ընդհանրապէս չեղարկելու նպատակով», ըսաւ արտաքին գործերու նախարարը, աւելցնելով որ Դամասկոսի հետ տակաւին չէ սկսած օրինական լուրջ քննարկումը:
