Սուրիոյ արտաքին գործերու նախարար Ասաատ Շիպէնի յայտնեց, թէ երկրին մէջ բացուած է անցումային նոր փուլ մը եւ սուրիացիները կը համախմբուին իրենց նոր իշխանութիւններուն շուրջ: «Մեր ժողովուրդը կը տօնէ Ասատի վարչակարգէն փրկութիւնը, թէեւ մարդոց տառապանքը տակաւին կը շարունակուի նախկին իշխանութիւններուն ձգած աւանդին պատճառով», ըսաւ սուրիացի նախարարը Պրիւքսէլէն, ուր կը մասնակցի Սուրիոյ հարցով նուիրատու կողմերու 9-րդ համագումարին: Շիպէնի բոլոր նուիրատու երկիրներուն եւ կազմակերպութիւններուն առաջարկած էր զօրակցիլ վերակառուցումի ծրագրերուն եւ կայուն զարգացումներու նպատակներու իրականացումին:
