ՀԲԸՄ-ՀԵԸ-ի Կեդրոնական վարչութեան պատուիրակութիւն մը, գլխաւորութեամբ ատենապետ Վիգէն Չերչեանի եւ ատենադպիր Յակոբ Ճըղըլեանի, Երեքշաբթի, 11 Մարտ 2025-ին, տեսակցեցաւ երիտասարդութեան եւ մարմնակրթութեան նախարար դոկտ. Նորա Պայրագտարեանի հետ՝ քննարկելու մարզական դիւանագիտութեան, երիտասարդներու ներգրաւուածութեան եւ լիբանանեան ու հայկական կազմակերպութիւններու համագործակցութեան վերաբերող հիմնական նախաձեռնութիւններ:
ՀԵԸ-ի պատուիրակութիւնը լուսարձակի տակ առաւ Միութեան մարզական, սկաուտական եւ համալսարանական ու երիտասարդական ընդարձակ գործունէութիւնը, որ կը ներառէ պասքէթպոլ, ֆութպոլ, մինի-ֆութպոլ, փինկ փոնկ, թէիքուանտօ, ճատրակ, թենիս, մարմնակրթութիւն, սկաուտութիւն եւ երիտասարդական ու մշակութային ծրագրեր:
Շնորհաւորելով անոր նախարար նշանակումը, պատուիրակութիւնը դոկտ. Պայրագտարեանին ներկայացուց ՀԵԸ-ի նախաձեռնութիւնները եւ երկուստեք քննարկուեցաւ, թէ ինչպէս կարելի է նպաստել երիտասարդութեան հզօրացման ուղղուած նախարարութեան տեսլականին՝ մասնակցելով անոր ծրագրերուն:
ՀԲԸՄ-ՀԵԸ-ի մամլոյ եւ տեղեկատուական գրասենեակ
