Անցնող օրերուն համացանցին վրայ տարածուեցան ատրպէյճանական բանտին մէջ արգելափակուած եւ ապօրինի դատավարութեան ենթարկուող հայ գործարար, Արցախի պետական նախկին նախարար Ռուբէն Վարդանեանի լուսանկարները, ուր ան զգալիօրէն թոյլ եւ խոշտանգուած էր: Արցախի մարդու իրաւունքներու պաշտպան Գեղամ Ստեփանեան յիշեցուց, որ իրենք բազմիցս ահազանգած են Ատրպէյճանի մէջ պահուող հայերուն դիմագրաւած ծանր իրավիճակին մասին, մանրամասն ներկայացնելով խոշտանգումներուն վերաբերող ապացոյցները: Ան մարդոց կոչ ուղղեց հասկնալու, որ այս օրերուն բողոքելով կը պաշտպանեն ոչ թէ որոշ անձերու իրաւունքները, այլ՝ համայն հայ ժողովուրդը: Հայաստանի Անվտանգութեան խորհուրդի նախագահ Արմէն Գրիգորեան նշեց, թէ ծանր տպաւորութիւն ձգած է ոչ միայն Ռուբէն Վարդանեանի լուսանկարը, այլ բոլոր բանտարկեալներունը: Ան վստահեցուց, որ կառավարութեան կողմէ անհրաժեշտ աշխատանքը տարուած է՝ գերիները տուն վերադարձնելու համար:
Հայաստանի Արտաքին գործերու նախարարութիւնը յայտարարութեամբ մը Պաքուն ամբաստանած էր բանտարկուած հայերը խոշտանգելու եւ ճնշումի այլ միջոցներ բանեցնելու մէջ: Յայտարարութիւնը Ատրպէյճանէն պահանաջած էր իսկոյն վերջ տալ միջազգային օրէնքները խախտող արարքներուն եւ ազատ արձակել հայ գերիները: Ատրպէյճանի Արտաքին գործերու նախարարութիւնը պնդեց, թէ կտրականապէս կը ժխտէ հայկական ամբաստանութիւնները, որովհետեւ որեւէ օրէնք չի խախտեր, այլ իրաւունք ունի հետաքննելու եւ պատժելու այսպէս կոչուած ռազմական յանցագործները եւ պատասխանատուները:
