Կազային տիրապետելու եւ պաղեստինցի բնակչութիւնը տեղահանելու մասին Միացեալ Նահանգներու նախագահ Տոնըլտ Թրամփի յայտարարութիւններու լոյսին տակ, Պաղեստինի նախագահութեան բանբեր Նապիլ Ապու Ռուտէյնա յայտնեց, որ «Պաղեստինը, հողը, պատմութիւնը, սրբութիւնները եւ ժողովուրդը ծախու չեն, իսկ պաղեստինցիներուն շահերը ենթակայ չեն բանակցութեան, այլ ժողովուրդին արդար իրաւունքներն են»: Ըստ նախագահութեան, ժողովուրդը պիտի չհրաժարի իր արդար իրաւունքներէն, այլ յանձնառու պիտի մնայ իր ազգային անկախ որոշումներուն, որ կը ներկայացնէ ազատագրութեան կազմակերպութիւնը, պահանջելով անկախ պետութիւն եւ Երուսաղէմը՝ որպէս մայրաքաղաք:
Լիբանանի Արտաքին գործերու նախարարութիւնը հաղորդագրութեամբ մը դատապարտեց Կազային տիրապետելու մասին ամերիկացի նախագահ Տոնըլտ Թրամփի ծրագրերը: Ըստ նախարարութեան, Կազան գրաւելու եւ պաղեստինցիները տեղահանելու ծրագիրը փորձ է ճզմելու պաղեստինեան դատը եւ զայն ենթարկելու մոռացութեան:
