Լիբանանի մէջ տակաւին կը շարունակուի նոր կառավարութեան կազմութեան հոլովոյթը: Այս առումով, նշանակեալ վարչապետ Նաուաֆ Սալամ երէկ վերստին այցելեց Պաապտայի պալատ եւ հանրապետութեան նախագահ Ժոզէֆ Աունի հետ շարունակեց կազմութեան վերաբերող խորհրդակցութիւնները: Սալամ հանդիպումէն ետք յայտնեց, թէ աշխատանք կը տանի կազմելու նախարարական ներդաշնակ կազմ մը, որ հեզասահ կ’աշխատի եւ ուր հնարաւորութիւն չ’ըլլար խափանելու կառավարութեան որոշումները: Նախագահ Աուն Պաապտայի այցելուներուն հետ ունեցած զրոյցներուն մէջ շեշտեց, որ երկխօսութեամբ կարելի պիտի ըլլայ հասնիլ նախարարաց կազմի մը, որ կը հիմնուի իր նախապէս յայտարարած չափանիշերուն եւ սկզբունքներուն վրայ: Աուն գնահատեց Լիբանանի մէջ ընկերային եւ մարդասիրական օգնութիւններ մատուցող կազմակերպութիւններուն աշխատանքը եւ երկրի տնտեսական ճգնաժամը դիմագրաւելու մէջ անոնց ունեցած դերը:
Նախագահ Ժոզէֆ Աուն երէկ Պաապտայի պալատին մէջ ընդունեց նաեւ Լիբանանի մէջ Ֆրանսայի դեսպանը՝ քննարկելու Պէյրութ-Փարիզ յարաբերութիւնները, տարածաշրջանային խնդիրները եւ Լիբանանին տրամադրուած ֆրանսական աջակցութիւնը: Հանդիպումին ներկայ էր նաեւ հարաւի մէջ յայտարարուած զինադադարը դիտարկող միջազզգային յանձնախումբի ֆրանսացի փոխնախագահը: Աուն Փարիզին կոչ ուղղեց զօրակցելու լիբանանեան կեցուածքին, որ կը պահանջէ բռնագրաւեալ շրջաններէն իսրայէլեան անյապաղ եւ ամբողջական նահանջ, կոչ ուղղելով վերջ տալու հարաւի մէջ իսրայէլեան ուժերու գործած բռնութիւններուն եւ կործանումին: Նախագահը յիշեցուց, որ ըստ կնքուած զինադադարի համաձայնութեան, մինչեւ 18 Փետրուար պէտք է ազատ արձակուին լիբանանցի բոլոր գերիները: Պաաապտայի այցելուներէն էր նաեւ ամերիկացի դեսպանը:
