Ինչպէս արդէն յայտնի է, Հայաստանի մէջ տեղի կ’ունենան Համահայկական ձմեռնային երկրորդ խաղերը, որոնք պիտի տեւեն մինչեւ 7 Փետրուար: Հանդիսաւոր բացման արարողութիւնը տեղի ունեցաւ Շաբաթ, 1 Փետրուարին, ուր Լիբանանի դրօշին ներքոյ Պէյրութ եւ Անթիլիաս քաղաքները ներկայացնող 30 հոգինոց պատուիրակութեան մէջ յատկանշական ներկայութիւն կը կազմէր Համահայկական գործկոմի Գործադիր մարմինի անդամ եւ Հ.Մ.Մ.-ի Կեդրոնական վարչութեան ատենապետ ընկեր Միսաք Նաճարեանի գլխաւորած Հ.Մ.Մ.-ի ներկայացուցչական խումբը:
Նշենք, որ Համահայկական երկրորդ խաղերու կայացման հիմնական վայրը նախատեսուած է Ջերմուկ քաղաքը: Սակայն կարգ մը մարզաձեւերու համար, եղանակային անյարմարութիւնները կրնան ազդել յայտագրի փոփոխութեան վրայ:
Համահայկական ձմեռնային երկրորդ խաղերուն մէջ ընդգրկուած են «հոքի»ն, ճատրակը, մարզական պարերը, ձնամարտը, դահուկավազքը, լեռնադահուկը եւ «snowboard»ը:
Հայաստան-Սփիւռք կապերը ամրապնդող սոյն իրադարձութեան մանրամասնութիւնները պիտի ներկայացնենք պատուիրակութեան Պէյրութ վերադարձէն ետք, ընկեր Նաճարեանի հետ հարցազրոյցով մը:
