ՀՀ-ԱՄՆ երկկողմ փոխգործակցութեան ծիրին մէջ, Պաշտպանութեան նախարարութեան ռազմաբժշկական ապահովման վարչութեան դաշտային շարժական հիւանդանոցը կը մասնակցի Գերմանիոյ Դաշնային Հանրապետութեան Հոհենֆելս քաղաքին մէջ տեղակայուած ԱՄՆ ռազմակայանին մէջ տեղի ունեցող «Համատեղ լուծում-2025» բազմազգ զօրավարժութեան։
Վարժանքին ներգրաւուած ՀՀ ՊՆ բժշկական անձնակազմն ու ԱՄՆ-ի ազգային զօրախումբի գործընկերները համատեղ ձեւաւորուած խումբերով բարդ պայմաններու մէջ կը կատարեն վիրաւորներու տեսակաւորում, անյետաձգելի բժշկական օգնութեան ցուցաբերում, վիրաբուժական միջամտութիւններու իրականացում, ինչպէս նաեւ տարհանման կազմակերպում՝ բժշկական օգնութեան յաջորդ փուլ։
Զօրավարժութեան նպատակներն են բարձրացնել հիւանդանոցի անձնակազմին վարժուածութեան աստիճանը, կատարելագործել իրականին մօտ, բարդ պայմաններու մէջ աշխատանքներու կազմակերպման մասնագիտական հմտութիւնները, ինչպէս նաեւ առաւելագոյն չափով բարելաւել բազմազգ միջավայրի մէջ բժշկական ապահովման փոխգործակցուած կազմակերպման մակարդակը։
