Սուրիոյ անցումային շրջանի նախագահ Ահմատ Շարաա այսօր պիտի այցելէ Թուրքիա եւ տեսակցի նախագահ Ռեճեպ Թայիպ Էրտողանի հետ: «Կը հաւատանք, որ թուրք-սուրիական բնականոնացած յարաբերութիւնները պիտի ամրապնդուին ու աւելի զարգանան», ըսաւ Շարաա: Անոր արտաքին առաջին այցելութիւնը երկու օր առաջ էր դէպի Սէուտական Արաբիա, ուր թագաւորութեան ղեկավարութեան հետ արծարծեց երկկողմանի կապերը, Սուրիոյ աջակցելու միջոցները եւ տարածաշրջանի վիճակը:
Ապահովական առումով, Սուրիոյ քաղաքացիական անվտանգութիւնը յայտարարեց, թէ առնուազն 15 մարդ զոհուած է եւ 15 ուրիշներ վիրաւորուած, երբ ականուած ինքնաշարժ մը պայթած է Հալէպի հիւսիսարեւելեան Մէնպիճ քաղաքին մէջ: Իսկ Սուրիոյ հիւսիսարեւելեան շրջանին մէջ գործող Սուրիական ժողովրդավարական ուժեր քրտական կամակերպութեան ղեկավար Մազլում Ապտի յայտնեց, թէ տեսակցած է անցումային նախագահ Ահմատ Շարաայի հետ եւ քննարկած երկրին ապահովական ու քաղաքական զարգացումները: Քիւրտ հրամանատարը դիտել տուաւ, որ իրենք այժմ կեդրոնական իշխանութեան հետ կը բանակցին Սուրիոյ ապագայ դիմագիծին եւ քիւրտերուն ճակատագրին շուրջ: «Ասատի իշխանութեան տապալումին պէտք է յաջորդէ ապակեդրոն եւ աշխարհիկ իշխանութիւն մը՝ հիմնուած ժողովրդավարական սկզբունքներուն վրայ», ըսաւ Մազլում Ապտի: Ան ամերիկեան ուժերուն կոչ ուղղեց չհեռանալու սուրիական հողերէն, որպէսզի «Իսլամական պետութիւն» կազմակերպութիւնը չունենայ վերաշխուժանալու հնարաւորութիւն:
