Պաքուի մէջ ատրպէյճանական կառավարութեան կողմէ ֆինանսաւորուող վերլուծաբաններու մասնակցութեամբ համաժողով տեղի կ’ունենայ, որուն մասնակիցները կը քննարկեն Ֆրանսայի դերը հայ-ատրպէյճանական հակամարտութեան մէջ։
«Թուրան» գործակալութեան փոխանցմամբ՝ համաժողովը կազմակերպած է Ալիեւի կառավարութեան կողմէ ֆինանսաւորուող Պաքուի Միջազգային յարաբերութիւններու վերլուծութեան կեդրոնը։
Կառոյցի ղեկավար Ֆարիտ Շաֆիեւ իր ելոյթին մէջ մասնաւորապէս խօսած է Ատրպէյճանի իշխանութիւններու դժգոհութիւններուն մասին՝ «յօգուտ Հայաստանի Փարիզի պատմական կողմնակալութեան» վերաբերեալ։
Շաֆիեւ պնդած է, որ ֆրանս-ատրպէյճանական յարաբերութիւններու վատթարացման գործին մէջ ալ «կարեւոր դեր ունի հայկական գործօնը»։
Պաքու կը քննադատէ Փարիզը՝ «Հարաւային Կովկասի մէջ կայունութիւնը խաթարելու», «միակողմանի մօտեցման ու հայամէտ դիրքորոշման» «Հայաստանը զինելու» համար։ Երեւանն ու Փարիզը պարբերաբար կը շեշտեն՝ Ֆրանսան Հայաստանին միայն պաշտպանական սարքաւորումներ կը տրամադրէ։
