Պաքուի Ռազմական դատարանին մէջ շարունակուած է ԼՂ նախկին ռազմաքաղաքական ղեկավարութեան գործով շինծու «դատավարութիւնը»:
Ատրպէյճանական լրատուամիջոցներուն փոխանցմամբ՝ դատարանը մերժած է անոնց խափանման միջոց կալանքը տնային կալանքով փոխարինելու միջնորդութիւնը։
ԼՂ նախկին ղեկավարներու փաստաբաններուն մեծ մասը Պաքուի մէջ միջնորդութիւն ներկայացուցած էր անոնց խափանման միջոցը տնային կալանքով փոխարինելու վերաբերեալ։ Նման միջնորդութիւն չէր ներկայացուած միայն Արայիկ Յարութիւնեանի համար, քանի որ վերջինս առողջական վիճակի վերաբերեալ դժգոհութիւններ չէ յայտնած:
Նոյն դատարանին մէջ համաժամանակեայ ընթացող ԼՂ նախկին պետական նախարար Ռուբէն Վարդանեանին առնչուող նիստին դատարանը տուած է եւս 10 օր՝ Վարդանեանին ու պաշտպանին շինծու գործի նիւթերուն ծանօթանալու համար։ Անոր գործը կը քննուի ԼՂ նախկին ռազմաքաղաքական ղեկավարներու գործէն առանձնացուած։
Նախորդ դատական նիստին Վարդանեանի պաշտպանը միջնորդած էր անոր գործը միացնել միւս ղեկավարներու գործին եւ քննել միասին, սակայն դատարանը մերժած էր այդ միջնորդութիւնը։
2548 դրուագով հաւաքուած կեղծ եւ ակնյայտ յօրինուած ապացոյցներու հիմքով որպէս մեղադրեալներ կ’անցնին ընդհանուր առմամբ 15 անձ: Շինծու մեղադրանքներով ռազմական յանցագործութիւններու համար մեղադրուող հայերուն դատավարութիւնները մեկնարկած են Յունուար 17-էն:
