Ընդամէնը շաբաթ մը ետք կ’աւարտի երկամսեայ պատերազմը դադրեցուցած զինադադարի 60-օրեայ ժամկէտը, սակայն տակաւին յստակ չէ, թէ իսրայէլեան բռնագրաւող ուժերը պիտի գործադրե՞ն համաձայնութիւնը, թէ՞ ոչ: ՄԱԿ-ի ընդհանուր քարտուղար Անթոնիօ Կութերեշ կարեւորեց լիբանանեան բանակին տեղակայումը Լիբանանի բոլոր շրջաններուն մէջ, միաժամանակ Իսրայէլէն պահանջելով քաշուիլ գրաւեալ հողերէն եւ յարգել Լիբանանի գերիշխանութիւնը:
Իսրայէլեան ուժերը երէկ վերստին թիրախաւորեցին Քֆարշուպայի մերձակայ շրջանները եւ փորձեցին յառաջանայ Հուլայի ուղղութեամբ: Լիբանանեան բանակը յայտարարեց, թէ կը շարունակէ տեղակայումը սահմանային Այն Ըպլ, Տպըլ, Ռմէյշ Այնաթա եւ Պընթ Ժպէյլ բնակավայրերուն մէջ՝ այդ շրջաններէն իսրայէլեան ուժերու նահանջի լոյսին տակ: Հարաւարեւելեան հատուածին մէջ, զինուորներ երէկ Խիամի ճամբուն վրայ իսրայէլեան զինուորական ինքնաշարժներուն արգիլեցին հատել լիբանանեան անցարգելը, անոնց ստիպելով վերադառնալ սահմանային Քֆարքիլա, որ տակաւին կը գտնուի իսրայէլեան տիրապետութեան տակ:
Հարաւի սահմանային գօտիին վրայ շարունակուող աշխատանքներուն ընթացքին լիբանանեան բանակը զոհի մը մարմինը յայտնաբերեց Մարուն էլ Ռաս գիւղի մերձակայքէն: Լիբանանեան բանակի հրամանատարի պաշտօնակատար զօրավար Հասսան Աուտի Սուրի մերձակայ Պայյատա շրջանին մէջ այցելեց բանակի հետեւակներու 5-րդ զօրախումբին եւ յայտնեց, թէ բանակը Լիբանանի փրկութեան հնարաւորութիւնն է, դրուատելով զինուորներուն զոհողութիւնները եւ նուիրումը Լիբանանին ու լիբանանցիներուն հանդէպ: Իսկ Հըզպալլայի երեսփոխաններէն Ալի Ֆայյատ զգուշացուց, որ եթէ իսրայէլացի զինուորները մնան նոյնիսկ կտոր մը լիբանանեան հողի վրայ, ապա Հըզպալլա պիտի համարէ, որ զինադադարը փլուզուած է:
