Սուրիոյ նոր իշխանութեան հրամանատար Ահմատ Շարաա ընդունեց Իտալիոյ արտաքին գործերու նախարարին գլխաւորած պատուիրակութիւնը, ներկայութեամբ սուրիացի նախարար Ասաատ Շիպանիին: Զրուցակիցները արծարծեցին Սուրիոյ նոր իրավիճակը, Դամասկոս-Հռոմ յարաբերութիւնները, տարածաշրջանային խնդիրները, ինչպէս նաեւ Սուրիոյ նկատմամբ սահմանուած միջազգային պատժամիջոցներուն խնդիրը: Իտալացի նախարարը եւս կարեւորեց պատժամիջոցներուն չեղարկումը, որպէսզի իշխանութիւնները կարենան վերականգնել երկիրը: Սուրիոյ արտաքին գործերու նախարարը յանձնառութիւն յայտնեց Սուրիոյ բոլոր յարանուանութիւններուն իրաւունքները յարգելու որոշումին, աւելցնելով թէ շուտով պիտի գումարուի ազգային համագումար մը՝ մէկտեղելով սուրիական հաւաքականութեան բոլոր խմբաւորումները, միաժամանակ շեշտելով սուրիացիներուն նկատմամբ յանցանքներ գործողները խիստ պատժելու անհրաժեշտութիւնը:
Նոր իշխանութիւններուն որոշումով իրականացուող արմատական փոփոխութիւններու ծիրին մէջ, Կրթութեան նախարարութիւնը որոշեց չեղարկել քաղաքացիական կրթութեան դասանիւթը, անոր յատկացուած նիշերը հաւասարապէս բաժնելով պատմութեան եւ աշխարհագրութեան դասանիւթերուն միջեւ: Իսկ Դամասկոսի կառավարիչը խոստացաւ բացայայտել ու պատժել մայրաքաղաքի գլխաւոր Ումաուի մզկիթին մէջ տեղի ունեցած մահացու հրմշտուքին պատասխանատուները:
