Ֆրանսայի արտաքին գործերու նախարար Ժան-Նուէլ Պարօ յայտնեց Սուրիոյ նկատմամբ սահմանուած մարդասիրական պատժամիջոցները շուտով չեղարկելու մտադրութեան մասին: Լիբանանի տեղեկատուութեան նախարարի պաշտօնակատար Զիատ Մաքարի իր կարգին նշեց, որ լիբանանեան կառավարական պատուիրակութիւն մը շուտով պիտի այցելէ Սուրիա՝ վարչապետի պաշտօնակատար Նեժիպ Միքաթիի գլխաւորութեամբ: Լիբանանի հիւսիսարեւելեան սահմանային Հըրմէլ գաւառին կից սուրիական հողերուն վրայ երէկ առեւանգուեցաւ լիբանանցի մը՝ սուրիացի զինեալներու ձեռամբ: Առեւանգողները լիբանանցիին ընտանիքէն պահանջեցին քսան հազար ամերիկեան տոլարի փրկագին, մինչ հաղորդուեցաւ, որ մարդը չունի քաղաքական պատկանելիութիւն:
