Շուրջ երեք շաբաթ ետք կ’եզրափակուի երկամսեայ պատերազմը դադրեցուցած զինադադարը եւ տակաւին յայտնի չէ, թէ ինչ պիտի պատահի Յունուարի աւարտին: Նախ Հըզպալլայի՝ Լիթանի գետէն հիւսիս նահանջը պահանջող իսրայէլեան բանակը ոչ միայն կը շարունակէ մնալ Լիբանանի հարաւային գիւղերուն մէջ, այլ կ’իրականացնէ կործանումի յաւելեալ գործողութիւններ՝ խաղաղապահ անզօր ուժերու աչքին առջեւ: Իսրայէլացի զինուորները երէկ հրդեհներ բռնկեցուցին հարաւարեւելեան սահմանային Հուլա գիւղի շարք մը բնակարաններուն մէջ: Իսկ արեւմտեան հատուածի Նաքուրայի շրջանին մէջ իսրայէլացիները փակեցին շարք մը ճամբաներ եւ փլուզեցին բնակարաններ, մինչ ԵՈՒՆԻՖԻԼ-ի հետ լիբանանեան բանակի դիտարկում տեղի ունեցաւ Պայյատա-Նաքուրա ճամբուն վրայ: Իսրայէլեան բանակը հարաւի բնակչութիւնը վերստին զգուշացուց բնակարաններ վերադառնալէ, մինչեւ ապահովական գործողութիւններու եզրափակումը: Երէկ, իսրայէլեան հրաձգութեան թիրախ դարձան նաեւ սահմանային Թալուսէ եւ Պենի Հայան բնակավայրերը:
Հարաւի մէջ իր աշխատանքը կը շարունակէ նաեւ զինադադարի գործադրութեան հետեւող հնգակողմ յանձնախումբը, որուն ամերիկացի նախագահ զօրավար Ճեսփըր Փեֆըրզ երէկ այցելեց Խիամ, ուրկէ դրուատեց լիբանանեան բանակին ապահովական գործունէութիւնն ու արհեստավարժութիւնը: Ըստ ամերիկացի զօրավարին, բանակը իր մուտք գործած շրջաններուն մէջ կը գործադրէ անվտանգութիւնը ամրապնդող քայլեր եւ ականազերծումի աշխատանքներ՝ միջազգային խաղաղապահներուն ընկերակցութեամբ: Ըստ ամերիկացի զօրավարին, նշեալ աշխատանքներուն նպատակն է արագացնել եւ դիւրացնել լիբանանցի քաղաքացիներուն անվտանգ տունդարձը:
