Իսրայէլի վարչապետ Պենիամին Նեթանիահու յայտնեց, որ «ուժգին կը հարուածենք մեր թշնամիները, պատճառելով մեծ վնաս: Մենք կը քայքայենք Իրանի չար ճակատը եւ պատերազմ կը մղենք եօթը ճակատի վրայ»: Նեթանիահու պատրաստակամութիւն յայտնեց առողջ յարաբերութիւններ ունենալու Սուրիոյ նոր իշխանութեանց հետ, միաժամանակ սպառնալով սուղ գին վճարել տալ, եթէ նոր վարչակարգը Իրանին առիթ տայ վերստին տեղակայուիլ Սուրիոյ մէջ կամ բանալ Հըզպալլան զինամատակարարելու ուղիները: Իսկ պաշտպանութեան նախարար Իսրայէլ Քաց յոխորտաց, որ իրենք կործանած են կամ մեծ վնաս պատճառած Կազայի, Սուրիոյ եւ Լիբանանի մէջ գործող Իրանի թեւերուն:
Հըզպալլա եւս մեկնաբանեց Սուրիոյ մէջ իսրայէլեան յարձակումները եւ կոչ ուղղեց բոլոր միջոցներուն դիմելու, որպէսզի Իսրայէլ չյաջողի հասնիլ իր նպատակներուն, ցաւ յայտնելով արաբական եւ մահմետական լռութեան համար:
