Սուրիոյ անցումային կառավարութիւնը յայտարարեց, թէ նահանգներուն եւ քաղաքներուն մեծամասնութիւնը սկսած է վերադառնալ բնականոն կեանքի՝ տարրական ծառայութիւններու վերականգնումին շնորհիւ: Ըստ նոր իշխանութեան, Թուրքիոյ սահմանային գօտիի գաղթակայաններ ապաստանած սուրիացիները սկսած են վերադառնալ իրենց տուները: Կառավարութեան վարչապետ Մոհամմատ Պաշիր երկրէն փախուստ տուած քաղաքացիներուն յորդորեց վերադառնալ հայրենիք: «Սուրիան այժմ ազատ է, վերատիրացած իր փառքին եւ արժանապատուութեան», ըսաւ Պաշիր ու վստահեցուց, որ պիտի երաշխաւորեն բոլոր քաղաքացիներուն եւ յարանուանութիւններուն իրաւունքները: «Պիտի վերականգնենք բոլոր շրջաններուն անվտանգութիւնն ու կայունութիւնը, հայրենիք պիտի վերադարձնենք տեղահանուած սուրիացիները եւ տեղական օրէնքներուն հիման վրայ պիտի դատենք նախկին վարչակարգին ոճրագործները», ըսաւ անցումային վարչապետը, որ սկզբունքով պիտի իշխէ մինչեւ Մարտ 2025: Ան ցաւ յայտնեց, որ Սուրիան սնանկացած է, չկայ արտարժոյթ, այլ միայն իր արժէքը կորսնցուցած սուրիական դրամ:
Անցնող օրերուն Սուրիոյ մէջ իրականացուած յեղաշրջումը առաջնորդող «Դամասկոսի ազատագրութեան խորհուրդ» զինեալ համախմբումի ղեկավար, այժմ Սուրիոյ վարչական ընդհանուր հրամանատարութիւնը ստանձնած Ահմատ Շարահ (նախապէս՝ Ապու Մոհամմատ Կոլանի) այլ երկիրներու կառավարութիւններուն յորդորեց չմտահոգուիլ Սուրիոյ վիճակով, որովհետեւ ժողովուրդը չափազանց յոգնած է պատերազմներէն եւ կարողութիւն չունի մղելու նոր պատերազմ մը եւս: «Մեր վախը Ասատի վարչակարգէն, Իրանի եւ Հըզպալլայի միջամտութիւններէն էր, իսկ երկիրը այժմ պիտի ուղղուի վերակառուցումի, կայունութեան եւ բարգաւաճումի ուղիով», ըսաւ Շարահ:
Այսուհանդերձ, հակառակ Դամասկոսի նոր իշխանութիւններուն տուած հաւաստիացումներուն եւ յայտարարած կանոններուն, Սուրիոյ զանազան շրջաններու մէջ երէկ շարունակուեցան զինեալներու ձեռամբ գործուած ոտնձգութիւնները՝ նախկին իշխանութեան հետ համագործակցողներուն եւ պատերազմի տարիներուն աշխոյժ դերակատարութիւն ունեցողներուն նկատմամբ: Այս ծիրին մէջ, համացանցի ընկերային հաղորդակցութեանց հարթակները երէկ ողողուեցան Սուրիոյ մէջ նկարահանուած վայրագ տեսանիւթերով, որոնք արժանացած համատարած դատապարտումի եւ Սուրիոյ մէջ յառաջացած անորոշութեան առնչութեամբ լուրջ մտավախութիւններու:
