Հարաւային Լիբանանի մէջ տեղի ունեցած երկամսեայ պատերազմը դադրեցուցած համաձայնութեան խախտումներուն յաճախականութիւնը օրըստօրէ նուազած է, սակայն իսրայէլեան ուժերը, օգտուելով լիբանանեան հողերէն քաշուելու համար իրենց տրուած 60 օրերու պայմանաժամէն, կը շարունակեն ապօրինի գործողութիւնները Լիբանանի հարաւային սահմանամերձ շրջանին մէջ: Իսրայէլեան անօդաչու սարքեր երէկ թիրախաւորեցին ինքնաշարժ մը Այթարուն-Պընթ Ժպէյլ ճամբուն վրայ, ինչպէս նաեւ Սուր գաւառի Մէժտէլ Զուն գիւղը, առանց պատճառելու լուրջ վնասներ:
Լիբանանեան բանակը յայտարարեց, թէ զինադադարի գործադրութիւնը դիտարկող հնգակողմ յանձնախումբին ամերիկացի, ֆրանսացի եւ լիբանանցի զօրավարները ուղղաթիռով սաւառնած են Լիբանանի հարաւային հատուածին վերեւ: Անոնք հետեւած են Լիթանիի հարաւային շրջաններուն մէջ տիրող իրավիճակին՝ առ ի նախապատրաստութիւն յառաջիկայ շաբաթ գումարուելիք յանձնախումբի անդրանիկ նիստին:
