ԱՂՋԿԱՆՍ

Քնացիր աղջիկ …

Քնքուշ քօղածածկ գլուխդ հեշտագին

Հանգչեցուր մեղմիկ մայրիկիդ կուրծքին,

Եւ անուշ նիրհէ, ու երգըս մեղմիկ

Թող քեզի գողտրիկ օրօրներ հիւսէ:

Քնացիր՛ աղջիկ, թող ինքնաշարժը

Սլանայ արագ ին՜չ փոյթ քեզ կանչը

Ճամբան եզերող պղտոր գետակին,

Եւ կամ դաշտերուն փռուած իր ափին:

Թեւերու վրայ՝ դուն անրջային

Կը ճախրես հիմա, բայց յանկարծ ահա,

Գըլուխըդ կ’իյնայ իմ ձեռքիս վըրայ:

Ահ՛ աղուոր աղջիկ այդ հրեշտակային

Չբանաս աչքերդ պահն այնքան քաղցր է,

Որ պիտ՛ ուզէի յաւիտեան տեւէ…

ԲԱԶԷ

Դամասկոսէն վերադարձիս 23/04/1964

*Անտիպ քերթուածներ Երուանդ Գարաճեանէն