Պաղեստինի նախագահ Մահմուտ Ապպաս յայտնեց, որ «երկու պետութիւններու լուծումը պայմանաւորուած է նախ եւ առաջ Կազայի դէմ իսրայէլեան պատերազմի աւարտէն, որմէ առաջ կարելի չէ կատարել որեւէ քննարկում: Համաս շարժումի պատասխանատուներէն Պասէմ Նայիմ «Ֆրանս փրես» լրատու գործակալութեան հետ զրոյցի մը ընթացքին յայտնեց, որ իրենք պատրաստ են Կազայի մէջ յանգելու զինադադարի համաձայնութեան, պայմանաւ որ Իսրայէլ յարգէ որոշումը: Նայիմ Միացեալ Նահանգներու նորընտիր նախագահ Տոնըլտ Թրամփին կոչ ուղղեց ճնշում բանեցնելու Իսրայէլի վրայ, որպէսզի կարելի ըլլայ վերջ տալ զինուորական գործողութիւններուն:
Իսկ Ռուսիոյ արտաքին գործերու նախարարը շեշտեց, որ Համասի հետ հաղորդակցութիւններուն ընթացքին որպէս առաջնահերթութիւն կը քննարկէ իսրայէլացի գերիներու ազատ արձակումին թղթածրարը:
«Ժազիրա» լրատուական ցանցը հաղորդեց, թէ երէկ առնուազն 32 մարդ մահացած է Կազայի զանազան շրջաններու ուղղութեամբ գործուած իսրայէլեան յարձակումներուն հետեւանքով: Համասի կառավարութեան առողջապահութեան նախարարութիւնը իր կարգին յայտարարեց, թէ 2023-ի 7 Հոկտեմբերին բռնկած պատերազմին ընթացքին մահացած մարդոց թիւը հասած է 44 հազարի, մինչ վիրաւորներուն թիւը մօտեցած է 104 հազարի:
Միջազգային մեկնաբանութիւններուն մէջ, Ինտոնեզիոյ խորհրդարանը առաջարկեց Իսրայէլը վտարել ՄԱԿ-էն, որպէս պատիժ պաղեստինցիներուն դէմ գործուած բռնութիւններուն:
