Իսրայէլի պաշտպանութեան նորանշանակ նախարար Իսրայէլ Քաց երէկ շարունակեց ծայրայեղական ու թշնամական յայտարարութիւններ արձակել Լիբանանի նկատմամբ: Ան շեշտեց, որ «Լիբանանի մէջ զինադադար կամ քաղաքական որեւէ գործարք պիտի չկնքուի նախանշուած նպատակներու իրագործումէն առաջ»: Ըստ Քացի, Թել Աւիւ պիտի չհրաժարի լիբանանեան հողերէն զինեալ որեւէ գործողութեան հակադարձելու իրաւունքէն:
Հըզպալլայի «Հաւատարմութիւն դիմադրութեան» խմբակցութեան անդամներէն երեսփոխան Հասան Ֆատլալլա իր կարգին վստահեցուց, թէ «այն ինչ Իսրայէլ չէ կրցած առնել պատերազմով, վստահաբար պիտի չառնէ բանակցութեամբ»: Ան շեշտեց, որ Լիբանան կը մերժէ հպատակիլ իսրայէլեան պայմաններուն, այլ պիտի շարունակէ, յանձնառու մնալով Դիմադրութեան ուժին եւ առճակատումի որոշումին: «Թշնամին չէ կրցած կեդրոնանալ լիբանանեան հողի վրայ եւ նոյնիսկ գիւղ մը չէ գրաւած», ըսաւ Ֆատլալլա, ձախողած համարելով իսրայէլեան օդուժին գործողութիւնները:
Իսրայէլացի մէկ այլ ծայրայեղական քաղաքական գործիչ, պաշտպանութեան եւ արտաքին գործերու նախկին նախարար Աւիկտոր Լիպըրմէն զգուշացուց, որ «եթէ լիբանանեան բանակը արագօրէն չշարժի Հըզպալլայի դէմ, ապա Իսրայէլ պէտք է ծանրօրէն ռմբակոծէ նաեւ լիբանանեան ենթակառոյցները»:
