* ԳԱԼԻՖՈՐՆԻԱ – «Մասիս» շաբաթաթերթը կը տեղեկացնէ, որ հովանավորութեամբ ԱՄՆ Արեւմտեան թեմի Առաջնորդ գերաշնորհ Տ. Յովնան Արք. Տէրտէրեանի, 24 Հոկտեմբերին տեղի ունեցաւ «21-րդ դարուն սփիւռքի մէջ ապրիլ եւ հայ մնալ» խորագիրով դասախօսական երեկոյ: Դոկտ. Չիլինկիրեան նոր սերունդի հայ երիտասարդներուն պարզեց ու բացայայտեց 21-րդ դարուն հայ մնալու մօտեցման ձեւն ու հնարաւորութիւնները լաւատեսութեամբ ու յուսադրելի պատկերացումով: Դոկտ. Չիլինկիրեան շեշտեց, որ յարգելով նոր սերունդի նոր գաղափարներն ու մտապատկերները որոնք յարկ է յարակից ըլլան նորագոյն ժամանակի սկզբունքներուն հետ, պէտք է պահել մեր արմատներուն կապող հայկական արժէքները:
* ԿԼԵՆՏԷԼ – 25 Հոկտեմբեր 2024-ին, Կլենտէյլի Հայ Աւետարանական Նազովրեցի եկեղեցոյ սրահին մէջ տեղի ունեցաւ սփիւռքահայ ծանօթ գրող եւ հասարակական գործիչ դոկտ. Հրայր Ճէպէճեանի «Հայ ազգագրական պատկերներ՝ տեսիլք, կամք եւ յոյս» գիրքին շնորհահանդէսը։ Գիրքին մասին խօսելով, իրաւաբան Ռուբէն Աւշարեան յայտնեց, որ «ինքնութեան մէջ շարք մը յօդուածներ են, գրուած 2018-2022 տարիներու ընթացքին, սփիւռքի տարբեր գաղթօճախներու մէջ լոյս տեսած օրաթերթերուն, շաբաթաթերթերու, ամսագրերու եւ կամ էլեկտրոնային կայքերու մէջ։ Անոնք արկնարկներ են եւ կամ ուղեգրութիւններ, հեղինակին վերաբերող տպաւորութիւններ եւ գիրքերու գրախօսականներ ու աստուածաբանական մեկնաբանութիւններ»։ Սրտի խօսքով իր ելոյթին մէջ դոկտ. Հրայր Ճէպէճեան անդրադարձաւ իր արտասահմանեան ուղեւորութիւններուն։ Ան ցաւ յայտնեց, որ աշխարհատարած հայ բեկորներուն մէջ Հարաւային Ամերիկա եւ այլուր նկատած է որ մեր մայրենի լեզուն շարունակական նահանջ մը կ’ապրի։
* ՊՈԼԻՍ – «Արմէնփրես» կը յայտնէ, որ Հայաստանի մէջ hայագիտական հետազօտութիւններու շրջանակին մէջ «Հայկական ինքնութեան պահպանման հետքերով» նախագիծի համահեղինակներ՝ միջազգայնագէտ, սփիւռքագէտ Քրիսթինա Ալեքսանեան եւ լրագրող, հասարակայնութեան հետ կապերու մասնագէտ Արմինէ Բրսոյեան այցելած են Սթամպուլի հայկական Գում Գափու թաղամասին մէջ գործող Հրանդ Տինքի անուան հայկական վարժարան, ուր հանդիպում ունեցած են վարժարանի սաներուն եւ անձնակազմին հետ։ Նախագիծի համահեղինակները այցելած են նաեւ Սթամպուի մէջ գործող «Ակօս» խմբագրատուն եւ պարբերականի հայկական էջերու գլխաւոր խմբագիր Բագրատ Էսդուքեանի հետ քննարկած են ներկայիս Թուրքիոյ մէջ հայկական մամուլի գործունէութեան հետ կապուած հարցեր։
* ՊՐԱԶԻԼ – «Նոր Մարմարա»-էն կ’իմանանք, որ Հայկական Բարեգործական Ընդհանուր Միութեան Պրազիլի մասնաճիւղը, իր հիմնադրութեան 60-ամեակին առիթով իւրայատուկ ու եզակի համերգ մը կազմակերպած է Սան Փաուլոյի մէջ։ Ձեռնարկը տեղի ունեցած է 28 Հոկտեմբերին, «Իւնիմէտ» թատրոնի սրահին մէջ։ Ելոյթ ունեցած են հայ երաժշտութեան երկու նուիրեալներ՝ պոլսահայ երգչուհի Սիպիլ եւ դաշնակահար Սերուժ Գրաճեան։ Երեկոյի ընթացքին յարգանքի տուրք մատուցուած է Եզնիկ վրդ. Կիւզէլեանին, որ նոյնպէս կարեւոր դեր ունեցած է «ՀԲԸՄ-Պրազիլ»ի եւ Պրազիլի հայ համայնքի պատմութեան մէջ։
* ԱՐԺԱՆԹԻՆ – Հայկական կեդրոնը յայտնած է Պուենոս Այրէսի, Լատին Ամերիկայի եւ Մեքսիքոյի կաթողիկէ հայերու եպիսկոպոս՝ մոնսենիոր Փապլօ Հաքիմեանի վախճանման մասին։ Երջանկայիշատակ կղերականը ծնած է Եգիպտոս, Գահիրէ: Ուսանած է Հռոմի Հայրապետական ճեմարանը, ուր վեց տարի փիլիսոփայական եւ աստուածաբանական ուսումնասիրութիւններէ ետք 1981-ին ձեռնադրուած եւ մեկնած է Արժանթին՝ որպէս Հայ Կաթողիկէ համայնքի քահանայ:
