Իսրայէլի Արտաքին գործերու նախարարութիւնը յայտարարեց, թէ առնուազն 10 իսրայէլացի վիրաւորուած եւ երկու հոգիի հետ կապը կտրուած է, երբ նախանացեալ գիշեր բախումներ սկսած են Հոլանտայի մայրաքաղաք Ամսթըրտամի մէջ՝ «Այաքս Ամսթըրտամ» ընդդէմ «Մաքապի Թել Աւիւ» ֆութպոլային եւրոպական մրցումի աւարտին, երբ ցուցարարներ բախած են իսրայէլացի համակիրներուն հետ՝ պաղեստինեան դրօշներու պղծումէն ետք: Աւելի ուշ, հոլանտական մայրաքաղաքի քաղաքապետը յայտնեց, որ իշխանութիւնները որոշած են անկախ հետաքննութիւն բանալ՝ պարզելու համար Հինգշաբթի գիշեր տեղի ունեցած բախումներուն մանրամասնութիւնները եւ ճշդելու յանցագործները: Ամսթըրտամի ոստիկանութիւնն ալ յայտարարեց 62 խռովարարներու ձերբակալութիւնը, հաւաստիացնելով որ անհետ կորսուած անձերը գտնուած են:
Իսկ իսրայէլեան իշխանութիւնները յայտարարեցին, թէ յաւելեալ օդանաւեր պիտի ուղղուին Հոլանտա, տուն վերադարձնելու համար այնտեղ մնացած շուրջ երեք հազար իսրայէլացիները, որոնք երէկ հերթով կը սպասէին տարհանումի: Միջադէպերու լոյսին տակ, իսրայէլեան բանակը արգիլեց բոլոր զինուորներուն Հոլանտա ուղեւորութիւնը, առ ի գործադրութիւն քաղաքական ղեկավարութեան ցուցմունքներուն: Հոլանտայի վարչապետը դատապարտեց խուլիկանութիւնները եւ հաստատեց, որ իր իսրայէլացի պաշտօնակից Պենիամին Նեթանիահուի հետ քննարկած է միջադէպին մանրամասնութիւնները:
