2016-էն 2020 թուականներուն Միացեալ Նահանգներու ղեկը ստանձնած նախագահ Տոնըլտ Թրամփ երէկ պաշտօնապէս շահեցաւ նախագահական երկրորդ նստաշրջան մը: Պէյրութի ժամանակացոյցով յետմիջօրէի եւ Ուաշինկթընի ժամանակացոյցով առաւօտեան արդէն յստակացած էր, որ 2020-ի ընտրութեան Ճօ Պայտընէն պարտութիւն կրած Թրամփ այս անգամ զգալի տարբերութեամբ առաջ անցած է Պայտընի փոխանորդ եւ Ժողովրդավարներու կուսակցութեան թեկնածու Քամալա Հարիսէն:
Ֆլորիտայի մէջ իր հետեւորդներուն առջեւ արտասանած խօսքին մէջ Թրամփ յաղթանակ յայտարարեց եւ խոստացաւ վերականգնել Միացեալ Նահանգներու փառքի օրերը: «Պիտի կարգաւորենք մեր սահմանին վիճակը: Մենք պատերազմներ պիտի չսկսինք, այլ զանոնք պիտի աւարտենք», խոստացաւ նորընտիր նախագահը: Նշենք, որ Թրամփ այս անգամ տիրացաւ նաեւ ժողովրդային մեծամասնութեան, իսկ Հանրապետականներու կուսակցութիւնը վերահաստատեց իր տիրապետութիւնը ծերակոյտին վրայ, որ անցնող տարիներուն կը վայելէր ժողովրդավարներու մեծամասնութիւն մը: Այն ինչ կը վերաբերի Ներկայացուցիչներու տան, ապա անոր ճակատագիրը տակաւին վերջնականապէս յստակ չէր մինչեւ ուշ գիշեր, սակայն նախնական պատկերը կը յուշէր հանրապետականներու մեծամասնութեան:
