Լիբանանեան սահմանային գօտիին մէջ գործող իսրայէլեան ուժերը երէկ շարունակեցին առաջնագիծի շարք մը գիւղերու բոլոր կառոյցները ամբողջութեամբ պայթեցնելու ոճրագործութիւնը: Մհայպիպէն եւ Մարքապայէն ետք, հերթը երէկ Արեւելեան հատուածի Մէյս էլ-Ժապալ գիւղին էր, ուրկէ թշնամին հրապարակեց համատարած կործանումին տեսագրութիւնը: Ժամեր անց, նշեալ գիւղէն արդէն հեռացած քաղաքացիները Կարմիր խաչի միջազգային կազմակերպութենէն պահանջեցին միջամտել եւ բացայայտել գիւղին մէջ մնացած չորս տարեցներու ճակատագիրը, աւելցնելով որ անոնց հետ կապը կտրուած է շուրջ մէկ ամիսէ ի վեր:
Հարաւային շրջաններն ու Պեքաան եւս երէկ ականատես դարձան հետեւողական հարուածներու: Արտակարգ իրավիճակներու կեդրոնը յայտարարեց, թէ Մաշղարայի մէջ մահացած է չորս մարդ, վիրաւորուած՝ երեք: Երեք քաղաքացի ալ զոհուած է Արապսալիմ գիւղին մէջ: Օդային հարուածներով եւ հրետանիով ռմբակոծուած են նաեւ Սուրի գիւղերը եւ Այթա Ժապալը:
Պեքաայի հիւսիսային Պաալպաք գաւառը անցնող երկու օրերուն ենթարկուեցաւ ծանրագոյն հարուածներու, որոնց լոյսին տակ քաղաքը գրեթէ դատարկուեցաւ ու քաղաքացիները ապաստանեցան Տէյր էլ-Ահմարի քրիստոնէաբնակ շրջանը եւ Աքքար՝ խուսափելու համար իսրայէլեան ծանր ռումբերէն:
Հըզպալլա իր կարգին յայտարարեց, թէ անօդաչու սարքերով եւ հրթիռներով թիրախաւորած է իսրայէլեան շարք մը զօրամասեր եւ խարիսխներ, ինչպէս նաեւ կրակ բացած է Լիբանանի հարաւային գիւղերուն կից կուտակուած իսրայէլեան ուժերուն վրայ: Իսրայէլեան բանակը խոստովանեցաւ վերջին 24 ժամերուն Լիբանանի հարաւային շրջաններուն մէջ առնուազն 9 զինուորներու վիրաւորումին մասին:
