Կրթական բնագաւառը եւ հայեցի դաստիարակութիւնը Ն.Ս.Օ.Տ.Տ. Արամ Ա. Վեհափառ Հայրապետին համար առաջնահերթ կարեւորութիւն ներկայացնող մարզը եղած է միշտ: Արդարեւ, Միացեալ Նահանգներու Արեւելեան Հայոց թեմ կատարած իր հովուապետական այցելութեան ընթացքին, Հայրապետը հոգեւոր թէ համայնքային պատասխանատուներուն թելադրեց առաջնահերթ կարեւորութիւն տալ կրթական կեանքին։
Այս ծիրէն ներս, Պոսթընի մէջ, Կիրակի, 13 Հոկտեմբեր 2024-ին, համայնքի նուիրեալ ընտանիքներէն՝ Կիւզէլեաններու բնակարանին մէջ տեղի ունեցաւ հանդիպում-ընթրիք մը, որուն ներկայ գտնուեցան Վեհափառ Հայրապետը եւ գաղութի զաւակներէն ոմանք։ Հանդիպման նպատակն էր Պոսթընի Ս. Ստեփանոս եկեղեցւոյ ամէնօրեայ վարժարանին ընդլայնման ու արդիականացման ամբողջական ծրագիրը ներկայացնել ու ստանալ պոսթընահայութեան զօրակցութիւնը։ Հանդիպման աւարտին, Կիւզէլեան ընտանիք ներկայացուց վարժարանին յիշեալ ծրագիրը եւ յոյս յայտնեց, որ Պոսթընի հայութիւնը թեւ ու թիկունք կը կանգնի ծրագրի իրականացման։ Նշենք, վարժարանի պատասխանատուները առանձին հանդիպում ունեցան Նորին Սուրբ Օծութեան հետ՝ իմանալու համար անոր տեսակէտը ծրագրին շուրջ։ Հայրապետը իր անվերապահ զօրակցութիւնը յայնեց անոնց, միաժամանակ թելադրելով՝ փուլային կերպով վարժարանը մինչեւ երկրորդական կարգի հասցնելու ծրագիր ունենալ։
Աւելի ուշ, Տիթրոյթի մէջ, Երեքշաբթի, 22 Հոկտեմբերին, նախաձեռնութեամբ Ս. Սարգիս եկեղեցւոյ, կազմակերպուեցաւ յատուկ հաւաք մը՝ սատարելու Մեծի Տանն Կիլիկիոյ Կաթողիկոսութեան Դպրեվանքին առաքելութեան։
Ընթրիքի ընթացքին ներկաները դիտեցին Դպրեվանքի առօրեային առնչուած կարճ տեսերիզ մը։ Յաջորդաբար խօսք առին երեկոյի հովանաւոր Ռաֆֆի Քիւրէճեան եւ Ս. Սարգիս եկեղեցւոյ հոգեւոր հովիւ Արժ. Տ. Հրանդ քհնյ. Գէորգեան, որոնք ընդգծեցին Դպրեվանքին օժանդակելու հրամայականը։
Աւարտին, ներկաներուն իր հայրապետական օրհնութեան խօսքը ուղղեց Վեհափառ Կաթողիկոսը։ Ան ըսաւ, որ Դպրեվանքը սովորական վայր մը չէ, ուր աշակերտներ կը յաճախեն սովորական ուսում ստանալու համար. Դպրեվանքը մարդակերտման, մա՛րդ պատրաստելու դարբնոց է: Այս սիրոյ սեղանին շուրջ գտնուող բոլոր հոգեւորականները անցած են Դպրեվանքէն, հոն թրծուած ու վերամարդացած են՝ երթալու եւ իրենց ծառայութիւնը մատուցելու մեր ժողովուրդի զաւակներուն: Դպրեվանքին նպատակն է Մեծի Տանն Կիլիկիոյ Կաթողիկոսութեան ծառայական ոգին դրոշմել մարդուն մէջ, ընդգծեց Վեհափառ Հայրապետը:
Կարեւորութեամբ յիշենք, որ Արամ Ա. կաթողիկոս հովուապետական բոլոր այցելութիւններու ընթացքին, շեշտեց գաղութներուն մէջ կրթական կեանքը վերակազմակերպելու կարեւորութիւնը՝ հայ դպրոցը նկատելով եկեղեցւոյ առաքելութեան կարեւոր տարածքներէն մէկը՝ հայ կեանքէն ներս հոգեւոր, բարոյական ու ազգային արժէքներու ամրապնդման նուիրուած։
