Ատրպէյճանի նախագահ Իլհամ Ալիեւ ընդունած է ԱՄՆ նախագահի յատուկ օգնական եւ Ազգային անվտանգութեան խորհուրդին մէջ եւրոպական հարցերով աւագ տնօրէն Մայքըլ Քարփենթըրըն։ Վերջինս Ալիեւին յանձնած է ԱՄՆ նախագահ Ճօ Պայտընի նամակը։
Ատրպէյճանական լրատուամիջոցներուն հաղորդմամբ՝ Պայտըն նամակին մէջ նշած է, որ գոհ է Ատրպէյճանի եւ Հայաստանի կողմէ ձեռք բերուած շարունակական յառաջընթացէն խաղաղութեան համաձայնագրի կնքման ուղղութեամբ, որ պիտի ծառայէ երկու երկիրներուն միջեւ յարաբերութիւններու կարգաւորման։
«Կ’ուզեմ ձեզի վստահեցնել, որ ԱՄՆ պատրաստ է աջակցելու Ատրպէյճանի եւ Հայաստանի միջեւ կայուն եւ արժանապատիւ խաղաղութեան ձեռքբերման, որ վերջ պիտի դնէ դարաւոր հակամարտութեան։ Ի յաւելումն Ատրպէյճանի ինքնիշխանութեան եւ տարածքային ամբողջականութեան ապահովման՝ խաղաղութեան համաձայնագիրը պիտի վերափոխէ ամբողջ տարածաշրջանը՝ հնարաւորութիւն տալով աւելի մեծ առեւտուր, ներդրումներ եւ կապ ունենալ Եւրոպայի ու Կեդրոնական Ասիոյ միջեւ: Քանի որ COP29-ին մէջ աշխարհի ուշադրութիւնը ուղղուած է դէպի Պաքու, դուք աննախադէպ հնարաւորութիւն ունիք համաշխարհային հանրութեան ցոյց տալու ձեր նուիրուածութիւնը խաղաղութեան: Խաղաղութեան համաձայնագրի չլուծուած կէտերը վերջնական տեսքի բերելը կը պահանջէ ստեղծագործութիւն եւ փոխզիջում երկու կողմերէն: Բայց վստահ եմ, որ դուք պիտի շարունակէք օգտուիլ այդ հնարաւորութենէն։ Կը հրաւիրեմ համաձայնագրին ստորագրումը աւարտին հասցնել այս տարի»,- կ’ըուի նամակին մէջ։
ԱՄՆ նախագահը նաեւ աջակցութեան պատրաստակամութիւն յայտնած է։
