Անցնող շաբաթավերջին ցաւով իմացանք լիբանանահայ գաղութի թատրոնի վարպետներէն Տիրան Սարգիսեանի անժամանակ մահուան մասին: Յուղարկաւորութիւնը տեղի ունեցաւ երէկ՝ Կիրակի, 20 Հոկտեմբերին, Ս. Վարդանանց եկեղեցւոյ մէջ:
Տիրան Սարգիսեանի մահով լիբանանահայութիւնը ընդհանրապէս եւ մշակութասէր ու արուեստասէր հանրութիւնը մասնաւորապէս կորսնցուցին հայ թատրոնի երկարամեայ եւ վաստակաշատ նուիրեալ մը: Ան անսակարկօրէն ծառայեց հայ թատրոնին ու իր կենսալից դերակատարումներով պայծառացուց հայ բեմը:
Այս տխուր առիթով, «Արարատ» իր խորազգաց ցաւակցութիւնները կը յատնէ հանգուցեալի ընտանեկան պարագաներուն, հարազատներուն եւ լիբանանահայ թատերական ընտանիքին: «Արարատ» յաջորդիւ իր յարգանքի տուրքը պիտի մատուցէ եւ պիտի անդրադառնայ թատրոնի մեծ վարպետին կեանքին ու գործունէութեան:
