«Էքս» հարթակին վրայ, Իսրայէլի արտաքին գործերու նախարար Իսրայէլ Կաց գրեց, որ Իսրայէլի իր նախարարութիւնը իրաւական եւ դիւանագիտական միջոցներ կը ձեռնարկէ Ֆրանսայի նախագահի որոշման դէմ՝ արգիլել իսրայէլեան ընկերութիւններուն ցուցադրել իրենց արտադրանքը յաջորդ ամիս Փարիզի մէջ կայանալիք Euronaval ցուցահանդէսի ընթացքին:
Ան նշեց, որ անընդունելի պայմաններու պարտադրմամբ երկրորդ անգամ իսրայէլեան ընկերութիւններու պոյքոթը հակաժողովրդավարական միջոց է, որ, իրենց կարծիքով, անընդունելի է յատկապէս բարեկամ երկիրներու միջեւ:
Ան կոչ ըրաւ նախագահ Մաքրոնին ամբողջութեամբ չեղարկելու այդ որոշումը։
Ան գրեց, որ Իսրայէլը միակ պետութիւնն է, որ կը գտնուի արմատական իսլամական վարչակարգի դէմ պայքարի առաջին գիծին վրայ, եւ Ֆրանսան, ինչպէս ամբողջ արեւմտեան աշխարհը, պէտք է կանգնի իրենց կողքին, ոչ թէ՝ իրենց դէմ:
4-7 Նոյեմբերին Փարիզի մէջ տեղի ունեցող միջոցառման կազմակերպիչ Euronaval-ը անցեալ շաբաթ իր յայտարարութեան մէջ նշած է, որ Ֆրանսայի կառավարութիւնը տեղեկացուցած է, որ իսրայէլեան պատուիրակութիւններուն արգիլուած է տաղաւարներ կամ ցուցադրական սարքաւորումներ ունենալ, բայց կրնան յաճախել ցուցահանդէսին: Որոշումը կը վերաբերի եօթը ընկերութիւններու:
