Օրեր առաջ «Արարատ»ի առաջին էջին վրայ կարճ յայտարարութիւն մը յղած էինք՝ մեր այցելութեան ժամերը յստակացնելով: Արձագանգները չուշացան: Ու խմբագրատունը հաճելի կենդանութիւն մը ստացաւ թերթիս բարեկամներուն յաջորդական հիւրընկալութեամբ:
Առաջին այցելուները՝ մէկը նախկին վաստակաշատ ուսուցիչ ընկեր Կարօ Պաղսարեանն էր, իսկ երկրորդը՝ Լիբանանահայ Բժշկական Միութեան անդամ տոքթ. Սերոբ Տեմիրճեանը: Երկուքն ալ հայ մամուլի հետ շփում ունեցած մարդիկ: Անոնք Ս.Դ.Հ.Կ.-ի Լիբանանի շրջանի տարբեր տարիներու Վարիչ մարմնոյ մէջ մամլոյ դիւանապետութեան պաշտօնը ձեռներէցութեամբ վարած ընկերներ են: Զրոյցներուն ընթացքին, նոյնատիպ միտքեր արծարծուեցան մամուլի դիմագրաւած մարտահրաւէրներուն եւ անոր հանդէպ համասփիւռ անտարբերութեան դէմ դարմաններ գտնելու մասին:
Այցելուները իրենց գոհունակութիւնը յայտնեցին ի տես վերջին շրջանին «Արարատ»-ի էջերուն մէջ նկատուող դրական փոփոխութեան, շնորհաւորեցին նոր տնօրէնն ու աշխատակազմը եւ սրտագին յաջողութիւն մաղթեցին անոնց յառաջիկայ աշխատանքներուն մէջ:
«Արարատ» իր կարգին շնորհակալութիւն կը յայտնէ պատուարժան ընկերներուն, հաստատելով որ այսպիսի այցելութիւններն ալ իրենց դրական դրոշմը կը տարածեն մամուլի նուիրական աշխատանքներուն վրայ:
