Հայաստանի զինուած ուժերը աւարտած են վեց միաւոր ATAGS 155 մմ/52 տրամաչափի հրետանային կայանքներու փորձարկումները, որոնք մատակարարուած են Հնդկաստանի կողմէ։ Այս մասին յայտնած է Indian Defence Research Wing (IDRW) Wing մասնագիտացուած կայքը։
Ըստ IDRW-ի աղբիւրներուն՝ հրետանային համակարգը անցած է բոլոր գործառնական փորձարկումները, որոնք իրականացուած են երկրի տարբեր վայրերու մէջ: Կը նշուի, որ ATAGS 155 մմ/52 վեց հրետանային համակարգերու խմբաքանակը ծրագրաւորուած է հայերէնով՝ հայկական կողմին պահանջով։
«Բացի անկէ, կատարուած են քանի մը այլ փոփոխութիւններ, որպէսզի հրետանային կայանքները յարմարեցուին հայկական զինուած ուժերու պահանջներուն։ Չնայած հրետանային համակարգերը ի սկզբանէ փորձարկուած են Հնդկաստանի մէջ՝ անոնք երկար ժամանակ չէին փորձարկուած Հայաստանի պայմաններուն մէջ»,- յաւելած է IDRW-ն։
IDRW-ի աղբիւրներուն համաձայն՝ այդ փորձարկումներուն յաջող աւարտը Հայաստանին թոյլ տուած է սկսիլ եւս 84 միաւոր ATAGS հրետանային կայանքներու գնման գործընթացը՝ հնդկական «Kalyani Groups» արտադրողէն։
«ATAGS հրետանային համակարգերու ձեռքբերումը զգալիօրէն պիտի բարձրացնէ հայկական բանակին հնարաւորութիւնները եւ պիտի ապահովէ անոր հրետանիի կրակային հզօրութեան այդքան անհրաժեշտ աճը: Այս ժամանակակից զէնքերը արժէքաւոր պիտի դառնան երկրի սահմանները պաշտպանելու եւ անոր ազգային անվտանգութիւնը ապահովելու գործին մէջ»,- կը նշէ IDRW-ի աղբիւրը։
