Յաջորդական երրորդ օրն ըլլալով երէկ շարունակուեցաւ իսրայէլեան օդային պատերազմը, որուն տրամագիծը ընդարձակուեցաւ՝ ներառելով լիբանանեան յաւելեալ շրջաններ, հասնելով Շուֆ եւ Քսըրուէն՝ հարաւի ու Պեքաայի բազմաթիւ շրջաններու կողքին: Նախանցեալ օրուայ հարուածները տակաւին չաւարտած, երէկ արեւածագի ժամերէն բացուեցաւ 25 Սեպտեմբերի հաշիւը եւ առաջին հարուածը բաժին հասաւ Շուֆ գաւառի Ժիյյէ եւ Սաատիաթ բնակավայրերուն միջեւ գտնուող շրջանին: Շուֆ եւ Ժըզզին գաւառներուն միջեւ աւելի ուշ թիրախաւորուեցաւ նաեւ Ժուն շրջանը, ուր քաղաքացիական անվտանգութիւնը գրանցեց 4 մահ, 7 վիրաւոր եւ 11 անհետ կորսուած մարդ:
Հարաւային Նապաթիէ գաւառին մէջ բազմաթիւ բնակավայրեր երէկ թիրախ դարձան իսրայէլեան հարուածներու՝ ներառեալ կառավարական հիւանդանոցին շրջակայքը, նիւթական վնաս պատճառելով հիւանդանոցին եւս: Մօտակայ Թըպնինի մէջ մահացաւ երկու հոգի, վիրաւորուեցաւ՝ 27: Իսկ հարաւային Պընթ Ժպէյլի ռմբակոծումը պատճառեց առնուազն երեք մահ:
Առողջապահութեան նախարարութիւնը նշեց, որ Պաալպաքի եւ Հըրմէլի շրջաններուն երէկ հասած հարուածներէն մահացած է 7 հոգի, վիրաւորուած՝ 38:
Երէկուայ մեծագոյն նորութիւնը Քսըրուէն գաւառի Մաայսրա գիւղի թիրախաւորումն էր՝ ահաբեկելու համար Հըզպալլայի Լեռնալիբանանի եւ Հիւսիսային Լիբանանի շրջաններու պատասխանատու շէյխ Մոհամմատ Ամրօն, որ չէր գտնուեր իր եղբօր պատկանող թիրախաւորուած տան մէջ: Այսուհանդերձ, ուժգին հարուածէն մահացաւ առնուազն երեք հոգի, իսկ երեկոյեան ռմբակոծուեցաւ Ժըպէյլ գաւառի Ռաս Օսթա գիւղը:
Առողջապահութեան նախարարի պաշտօնակատար Ֆիրաս Ապիատ երեկոյեան յայտնեց, որ երէկ ընդհանուր առմամբ մահացած է առնուազն 51 մարդ, իսկ վիրաւորներուն թիւը հասած է 225-ի: Ապիատ յիշեցուց, որ նախարարութիւնը 1787 հեռախօսային թիւը յատկացուցած է տեղահանուածներուն՝ ներկայացնելու իրենց կարիքները: Նշենք, որ իսրայէլեան երէկուայ ռումբերէն զոհուեցաւ «Մանար» հեռատեսիլի կայանի նկարահանողներէն Քամէլ Քարաքին՝ հարաւային Քանթարա գիւղի թիրախաւորումին ընթացքին: Իսկ Պաշտպանութեան գերագոյն խորհուրդի ընդհանուր քարտուղարութիւնը յայտարարեց, թէ իսրայէլեան ոտնձգութիւններուն պատճառով մինչեւ երէկ զոհուած է 1247 լիբանանցի, իսկ վիրաւորներուն թիւը կը հասնի 5300-ի: Իրենց տուներէն տեղահանուածներուն թիւը կը հատէ 104 հազարը:
Քաղաքացիական անվտանգութեան ծառայութիւնը երէկ յայտարարեց Ղոպէյրիի մէջ նախանցեալ օր թիրախաւորուած շէնքի փլատակներուն մէջ որոնողական աշխատանքներուն ամբողջացումը: «Վերջնական թիւերն են՝ 6 զոհ եւ 15 վիրաւոր», յայտարարեց ծառայութիւնը:
Իսրայէլեան բանակը յայտարարեց, որ կործանած է Հըզպալլայի հետախուզական ծառայութիւններու աւելի քան 60 դիրք ու ենթակառոյց, որոնք կը գործածուին տեղեկութիւններ հաւաքելու նպատակով: Իսրայէլեան զինուած ուժերու սպայակոյտի պետ Հըրցի Հալեւի յայտնեց Լիբանանի մէջ ցամաքային գործողութիւն կատարելու նախապատրաստութեանց մասին, պնդելով որ իրենց շարժումներուն նպատակն է կայունացնել ապահովական դրութիւնը եւ տուն վերադարձնել սահմանամերձ բնակավայրերէն տեղահանուած իսրայէլացիները: «Հըզպալլա ընդարձակեց հրթիռարձակումի շառաւիղը եւ պիտի ստանայ արժանի պատասխան», ըսաւ Հալեւի: Իսրայէլեան բանակը որոշեց նաեւ ծառայութեան կանչել պահեստային ուժերու երկու զօրախումբ՝ Լիբանանի հետ սահմանին վրայ պարտականութիւններ ստանձնելու համար:
