Լիթանի գետի ազգային հաստատութիւնը հաղորդագրութեամբ մը յայտարարեց, թէ գետին վերին աւազանին մէջ յայտնաբերուած է քոլերա: «Բացայայտումը եղած է գետի ջուրին հերթական քննութեան արդիւնքով», նշուեցաւ յայտարարութեան մէջ, աւելցնելով որ քոլերայի տարածումին գլխաւոր միջոց է ապականած ջուրը: «7 վայրերէ առնուած նմուշներէն երկուքին մէջ յայտնաբերուած է քոլերա՝ Շթուրայի եւ Տալհամիայի մէջ», նշեց հաստատութիւնը՝ պահանջելով անյապաղ դադրեցնել իրավիճակը աւելի բարդացնող բոլոր գործունէութիւնները, նկատի առնելով շրջանին մէջ քոլերայի տարածումին վտանգաւոր հետեւանքները: Իսկ առողջապահութեան նախարարութիւնը յստակացուց, թէ մօտէն կը հետեւի Լիթանիի մէջ քոլերայի առկայութեան մասին տարածուած լուրերուն, հաւաստիացնելով սակայն, որ ցարդ Լիբանանի մէջ չկան քոլերայով հիւանդներ: Նախարարութիւնը կոչ ուղղեց պատուաստուելու քոլերայի դէմ, մանաւանդ նկատի առնելով անոր տարածումը Սուրիոյ մէջ:
