Ներքին ապահովութեան ուժերու ընդհանուր տնօրէնութիւնը գուժեց իր ծառայողներէն Նիքոլա Մոհամմատ Մոքտատի նահատակութիւնը, որ պատահեցաւ Պիր Հասան շրջանին մէջ տեղի ունեցած հրաձգութեան հետեւանքով: Ըստ յայտարարութեան, մինչ ապահովութեան ուժերը խուզարկումներ կը կատարէին նշեալ շրջանին մէջ՝ բացայայտելու ելեկտրական թելեր թալանող աւազակախումբի մը անդամները, անծանօթ զինեալ մը կրակ բացած է անոնց վրայ եւ ծանրօրէն վիրաւորած Նիքոլա Մոհտատը, որ օր մը ետք մահացած է հիւանդանոցին մէջ: Շուտով ի յայտ եկած է նաեւ ոճրագործին ինքնութիւնը՝ 1986-ի ծնունդ լիբանանցի մը, որ արդէն կը հետապնդուէր խնդիրներ հրահրելու եւ օրինական ուժերուն դիմադրելու յանցանքով: Ան որոշ ժամանակ անց ներկայացած է Տեղեկահաւաքի բաժանմունք եւ ինքզինք ու ատրճանակը յանձնած:
