Որոշած էի չանդրադառնալ Բագրատ Սրբազան Գալստանեանին «Տաւուշը յանուն Հայրենիքի» շարժման եւ շարժման զարգացումներուն: Այդ որոշումիս պատճառները ունէին անձնական, գաղափարական եւ քաղաքական բնոյթ, սակայն քանի մը օր առաջ փոխեցի որոշումս. ի՞նչը դրդեց, որ ետ դառնամ որոշումէս եւ այս վերնագիրը գրեմ:
Ա.- Վերջերս Հայաստան կը գտնուէի եւ առիթ ունեցայ խօսելու իմ ծանօթ եւ անծանօթ հայրենակիցներուս հետ, եւ, մեղքս չթաքցնեմ, երբեմն ալ ես ուղղորդեցի զրոյցը ճիշդ հասկնալու Բագրատ Սրբազանի շարժման մասին տարբեր խաւերու պատկանող մարդոց կարծիքները: Խօսեցայ քաղաքականապէս համեստ մտածողութիւն ունեցող մարդոց, հանդիպեցայ մտաւորականներու, քաղաքականութենէն քիչ մը հասկցողներու եւ վերջապէս քաղաքական գործիչներու հետ: Ճիշդ է, որ խօսակցութեան ոճն ու օգտագործուած բառապաշարը կը փոխուէին մէկ խաւէն միւսը: Հակառակ այն փաստին, որ ես կը հարցնէի Բագրատ Սրբազանին շարժման քաղաքական գաղափարական բովանդակութեան եւ ծրագրային հեռանկարներուն մասին, ակամայ խօսակցութեան սլաքները յաճախ կ’երթային այլ ուղղութիւննեով, զրուցակիցներուս մեծամասնութեան մօտ նեղուածութիւն մը կը զգայի մեր ազգային առաքելական եկեղեցւոյ քանի մը հովիւներու եւ ծառայողներուն հանդէպ, որոնց անունները կապուած են նախկին փտած շրջանակներուն հետ:
Հասայ այն եզրակացութեան, որ Սրբազան Գալստանեանի առաջնորդած եւ յստակ ծրագիր մը չունեցող շարժումը դուռ կը բանայ նաեւ մեր Սրբութիւներէն՝ Մայր Աթոռի բարձրաստիճան հոգեւորականներու հանդէպ քննադատական արտայայտութիւններ լսելու, այն ինչ շատ տհաճ էր ինծի լսել նման խօսքեր:
Բ.- Քաղաքական գործիչ դարձած Բագրատ Սրբազանը օրեր առաջ, Շիրակի մարզի բնակիչներուն հետ հանդիպումէն յետոյ յայտարարեց որ, «վարչապետ Նիկոլ Փաշինեանին հեռացնելու օրակարգով Սեպտեմբերին պայքարի երկրորդ փուլ է սպասւում»: Ան աւելցնելով՝ լրագրողներէն մէկուն ըսաւ, որ «պայքարին միացել են ոչ միայն երկրի ներսում, այլեւ դրսից» : Իր դաշնակցներուն կողմէ լքուած կամ խաբուած գերաշնորհ սրբազան հայրը, որ վարչապետ դառնալու յաւակնութիւն ունի, ի՞նչ կամ որո՞նց նկատի ունի «դրսից» բառով, մութ է մեզի համար: Հաւաանաբար սրբազանին մօտ վրիպած է, որ Հայաստանի Հանրապետութեան վարչապետը Հայաստանի «ներսից»՝ այսինքն Հայաստանի մէջ ապրող բնակիչները կ’ընտրեն, կամ հաւաանաբար սրբազանը չի գիտակցիր այդ արտայայտութեան վտանգին եւ Հայաստանի Հանրապետութեան օրէնքներու կոպիտ ոտնահարում ըլլալուն մասին:
Յամենայն դէպս ներքին դաշնակիցներու աջակցութիւնը մեծամասամբ կորսնցուցած, նաեւ «դրսի» ուժերուն վրայ վստահած Բագրատ սրբազանի ծրագրերը եւ քաղաքական գործունէութեան ուղեգիծը յառաջիկայ օրերուն կը բացայայտուին:
Պարզապէս նշմար մըն էր ըրածս, խիղճս հանգստացնելու համար:
Մինչ հանդիպում, Աստուած օգնական, Բագրատ սրբազան:
ՍԱՄՈՒԷԼ ՂԱԶԱՐԵԱՆ
