«ՄԵՆՔ ՕՐԷ-ՕՐ ԲԱՐԵԼԱՒՄԱՆ ՄԷՋ ԵՆՔ», Կ’ԸՍԷ ՓԵԹՐԱՔՈՎ
Հիւսիսային Մակեդոնիոյ մէջ տեղւոյն հաւաքականը հիւրընկալեց Հայրենի հաւաքականը, որ 2-0 արդիւնքով ցա-ւալի պարտութիւն մը կրեց:
Այս մրցումին մասին մամլոյ ասուլիսի ժամանակ, Հայաստանի խումբին գլխաւոր մարզիչ Ալեքսանտր Փեթրաքով գովաբանած է հայրենի ֆութպոլիստներուն յառաջդիմութիւնը, առանձնացնելով յատկապէս Հարոյեանը, Չանչարեւիչը, Յովհաննիսեանը, Չալըշըրը, Թիկնիզեանը, Պիչախճեանը, անոնց ներկայութիւնը հաւաքականին մէջ կարեւոր նկատելով: «Մենք շատ աշխատանք կը կատարենք», ըսած է մարզիչը, «խաղէ-խաղ ֆութպոլիստները կը բարելաւեն իրենց որակը»: Բարձր գնահատելով Հիւսիսային Մակեդոնիոյ կազմը, Փեթրաքով ապահոված է, որ մրցումին կը պատրաստուին գիտակցելով անոնց մակարդակին մասին:
Յիշեցնենք, որ հայրենի ֆութպոլիստները ՈՒԵՖԱ-ի Ազգերու լիկայի զտումի խաղերուն բացումը երեւանի մէջ կատարեցին 4 – 1 մեծ արդիւնքով:
Միայն արդիւնքներ
Փորթուկալ x Սքոթլանտ 2 – 1
Զուիցերիա x Սպանիա 1 – 4
Շուէտ x Էսթոնիա 3 – 0
Խրուաթիա x Լեհաստան 1 – 0
Կիպրոս x Քոսովօ 0 – 4
Թուրքիա x Իսլանտա 3 – 1
Ֆրանսա x Պելճիքա 2 – 0
Սլովենիա x Ղազախիստան 3 – 0
Ռումանիա x Լիթուանիա 3 – 1
Իսրայէլ x Իտալիա 1 – 2
Նորվեկիա x Աւստրիա 2 – 1
Մոնթէնէկրօ x Կալէս 1 – 2
Լաթվիա x Ֆարօ Կղզիներ 0 – 1
ՈւԵՖԱ-ի Ազգերու Լիկայի մրցապայքարը պիտի շարունակուի սոյն թուականի 10 Հոկտեմբերին:
ԸՍՏ ՄԵՍՍԻԻ ՃՈՐՏԸՆ ԼԱՒԱԳՈՅՆՆ Է
SPORT-ի թղթակիցը աշխարհահռչակ ֆութպոլիստ Լիոնէլ Մեսսիի հետ հարցազրոյցի մը ընթացքին, հետաքրքրուելով այն հարցին մասին թէ՝ որո՞ւն կու տար համաշխարհային մարմնամարզի պատմութեան լաւագոյն մարզիկի տիտղոսը, Արժանթինի հաւաքականի խմբապետը պատասխանած է. «Կը կարծեմ, որ Մայքըլ Ճորտընը պատմութեան լաւագոյն մարզիկն է: «Վերջին պարը» հեռատեսիլային ֆիլմաշարը դիտելէս վերջ ոգեշնչուեցայ եւ աւելի հասկցայ, թէ ով է ան»:
Ի դէպ, պասքեթպոլի նախկին տիտան՝ 61 տարեկան Մայքըլ Ճորտըն եղած է ողիմպիական կրկնակի եւ NBA-ի վեցակի ախոյեան:
ՊԱՍՔԷԹՊՈԼ – ԱՐԱԲԱԿԱՆ ԱԿՈՒՄԲՆԵՐՈՒ 36-ՐԴ ԱԽՈՅԵԱՆՈՒԹԻՒՆ
ԼԻԲԱՆԱՆԷՆ ԵՐԿՈՒ ԱԿՈՒՄԲՆԵՐՈՒ ՄԱՍՆԱԿՑՈՒԹԵԱՄԲ
Յառաջիկայ Հոկտեմբեր 1 – 12-ին, Եգիպտոսի մէջ տեղի պիտի ունենայ պասքէթպոլի արաբական ակումբներու 36-րդ ախոյեանութիւնը: Արդէն յայտնի են բոլոր 16 խումբերը, որոնք, ըստ զտման վիճակաձգութեան, բաժնուած են չորս խմբակներու մէջ:
Ա. Խմբակ
Իթթիհատ (Եգիպտոս)
Սալլէ (Մարոք)
Անթունիէ (Լիբանան)
Ալ-Ուահտէ (ԱՄԷ)
Բ. Խմբակ
Ալ-Արապի (Քաթար)
Սամուհա (Եգիպտոս)
Ալ-Շարժա (ԱՄԷ)
Քազիմա (Քուէյթ)
Գ. Խմբակ
Պէյրութ Քլապ (Լիբանան)
Ալ-Սաապ (Օման)
Ալ-Քատիսիյէ (Քուէյթ)
Ալ-Պաթայէհ (ԱՄԷ)
Դ. Խմբակ
Ալ-Ղարաֆա (Քաթար)
Ուատա Պոֆարիք (Ալճերիա)
Սփորթինկ (Եգիպտոս)
Հատէր Մօթ (Եմէն)
«ԴՈ՞ՒՔ ԱԼ, ՊՐՈՒԹՈՍ»
ՉԻՆԱՍՏԱՆԻ ՄԷՋ 43 ՖՈՒԹՊՈԼԻՍՏ ՑՄԱՀ …
«South China Morning Post»-ը կը յայտնէ թէ Չինաստանի ֆութպոլի միութիւնը (CFA) ցմահ որակազրկած է 43 ֆութպոլիստ՝ պայմանաւորուած խաղեր կազմակերպելու համար։
Չինաստանի Հանրային անվտանգութեան նախարարութիւնը այս յայտարարութիւնը կատարած է մարմնամարզի համար ապօրինի մոլախաղերու երկամեայ հետաքննութեան աւարտէն ետք։ Անոր արդիւնքով պատասխանատուութեան պիտի ենթարկուին 128 անձ, որոնց մէջ նաեւ՝ 43 ֆութպոլիստ: Այս վերջինները ցկեանս պիտի զրկուին ֆութպոլ խաղալէն:
Պայմանաւորուած խաղերուն մէջ ներգրաւուած մարզիկներու շարքին են Քորէայի ազգային հաւաքականի խաղցող Սոնկ Ճուն Հոն եւ Չինաստանի հաւաքականի նախկին անդամ Ճին Ճինթաունը:
Իսկ Չինաստանի ֆութպոլի միութեան նախկին նախագահ Չեն Սիւ Եանին դատարանը անցեալ Մարտին դատապարտած էր ցմահ ազատազրկման՝ մեծ գումարներու կաշառք ստանալու համար:
