Միւս կողմէ, խորհրդարանի նախագահ Նեպիհ Պըրրի Այն Թինէի մէջ ընդունեց Ազգային համախոհութիւն համախմբումի պատուիրակութիւնը, որուն մաս կազմեցին երեսփոխաններ Ֆայսալ Քարամէ, Հասան Մրատ, Ատնան Թրապուլսի, Թահա Նաժի, ինչպէս նաեւ համախմբումի խորհրդականներ Ահմետ Տապպաղ, Ալաա Ժալալըտտին, Օսման Մաժզուպ եւ Ահմատ Հասան: Խորհրդակցութիւնները ընդգրկեցին երկրին ընդհանուր իրավիճակը, քաղաքական զարգացումները եւ օրէնսդրական խնդիրները: Արժանապատուութիւն հոսանքի ղեկավար, երեսփոխան Ֆայսալ Քարամէ խորհրդարանի նախագահին հետ հանդիպումէն ետք նշեց, որ խորհրդակցութիւնները կեդրոնացան ընթացիկ հարցերուն ու անոնց լուծումներուն մասին: Քննարկուեցաւ նաեւ Կազայի վիճակը եւ անոր ազդեցութիւնը Լիբանանի վրայ: Ան պատուիրակութեան անունով ամբողջական զօրակցութիւն յայտնեց հարաւի ժողովուրդին:
