Հայաստանը շատ քայլեր կատարած է, նոյնիսկ ըրած է աւելին՝ օրէնքի գերակայութեան եւ եւրոպական չափորոշիչներու հաստատման ճանապարհին։
ՀՀ արտաքին գործերու նախարար Արարատ Միրզոյեանի հետ մամլոյ ասուլիսի ընթացքին այդ մասին ըսած է Լիւքսեմպուրկի փոխվարչապետ, արտաքին գործերու եւ արտաքին առեւտուրի նախարար Քսավյէ Պեթելը:
«Առաջին անգամ կ’այցելեմ տարածաշրջան եւ, մասնաւորապէս, Հայաստան։ Այցը կարեւոր է առկայ երկկողմ յարաբերութիւնները սերտացնելու եւ անոնց շարունակական բնոյթ տալու առումով։ Կը տեսնենք, որ համագործակցութեան համար կայ շատ մեծ ներուժ։ Անշուշտ, յիշարժան էր նաեւ պարոն Միրզոյեանի այցը Լիւքսեմպուրկ՝ մեզ մօտ Հայաստանի դիւանագիտական ներկայացուցչութիւն բանալու կապակցութեամբ։ Ես ժամանած եմ Հայաստան ձեր երկրին համար կարեւոր փուլին եւ իմ գործընկերոջ հետ բանակցութիւններու ընթացքին համոզուեցայ, որ գործ ունիմ մարդու մը հետ, որ իսկապէս կը փափաքի լուծումներ տալ դժուարին իրավիճակներու մէջ։ Պատմական փորձերէ ելլելով՝ պէտք է նշեմ, որ Լիւքսեմպուրկը նախապէս նոյնպէս ունեցած է դժուար յարաբերութիւններ հարեւան երկիրներու՝ Գերմանիոյ, Ֆրանսայի եւ Պելճիքայի հետ։ Յատկապէս Գերմանիոյ հետ յարաբերութիւնները ամենեւին հեշտ չեն եղած, բայց այսօր մենք անվտանգ միջավայրի մէջ կ’ապրինք համերաշխութեամբ եւ խաղաղութեամբ՝ իրականացնելով համատեղ ծրագրեր»,- ըսաւ Պեթել։
Ան նշեց, որ իր մեծագոյն ցանկութիւնն է նաեւ, որ հայերը ապրին ապահով իրավիճակի մէջ եւ չվախենան հարեւանի վարքագիծէն։ Ան առանձնայատուկ կերպով շեշտեց, որ երբեք չէ ընդունած եւ ապագային ալ չ’ընդունիր ուժային մեթոտներով հարցեր լուծելու տարբերակը։
«Իւրաքանչիւր ազգ պէտք է ունենայ խաղաղ պայմաններու մէջ ինքնադրսեւորուելու հնարաւորութիւն։ Երիտասարդները պէտք է տեսնեն, որ Եւրոմիութիւնը երկրագունտի հակառակ կողմը չէ, այլ աւելի մօտ է։ Այսօր Հայաստանի հետ յարաբերութիւնները կը սերտացնենք խաղաղութեան գործիքներով, վիզաներու ազատականացման գործընթացի մեկնարկի շուրջ բանակցութիւններ վարելով եւ այդ ամէնը կը վկայէ ընդհանուր արժէքներ եւ նախագիծեր ունենալու իրողութիւնը։ Կ’ուզեմ, որ իմանաք՝ մենք, որպէս Եւրոմիութիւն, պատասխանատուութիւն կը կրենք եւ չենք կրնար հայ ժողովուրդին պարզապէս ըսել, որ լոկ քայլեր կատարեն համարկման ճանապարհին։ Անհրաժեշտ է, որ Հյաստանը կարգաւորէ յարաբերութիւնները իր հարեւաններուն հետ։ Հնարաւոր չէ անցեալը փոխել, բայց կարելի է դասեր քաղել պատմութենէն՝ ապագան կերտելու համար։ Ատիկա բոլորիս պարտականութիւնն է»,- ըսաւ դիւանագէտը։
Պեթել հաւաստիացուց, որ իրենց պարտաւորութիւնն է նաեւ նպաստել, որպէսզի հայ ժողովուրդը ապրի անկախ երկրի մէջ, առանց վախի մթնոլորտի եւ չյայտնուի այնպիսի իրավիճակի մէջ, որ ստիպուած ըլլայ կատարել դժուարին ընտրութիւն։ Ըստ անոր՝ հայ ժողովուրդը պէտք է ունենայ իր ընտրած ուղին, այլ ոչ թէ անցնի ուրիշներու կողմէ նախանշուած ճանապարհով։
