Առողջապահութեան նախարարութեան արտակարգ իրավիճակներու կեդրոնը յայտարարեց, թէ չորս մարդ վիրաւորուած է հարաւային Հապիպ բնակավայրի ռմբակոծումէն: Իսրայէլեան օդուժը թիրախներ հարուածեց նաեւ Քֆարքիլա եւ Թիպէ գիւղերուն մէջ: Հըզպալլա, իր կարգին, հաղորդագրութիւններով յայտարարեց, թէ անօդաչու սարքերով յարձակում գործած է Աքքայի մօտակայ զօրամասի վրայ, պատճառելով ծանր վնասներ: Իսկ «Ժամաա իսլամիէ» կուսակցութեան զինեալ թեւ Ֆաժրի ուժերը յայտարարեցին իսրայէլեան Պէյթ Հիլալի դիրքը ռմբակոծելու մասին:
Իսրայէլեան ապահովական սեղմ կառավարութեան նախկին անդամներէն Պենի Կանց շեշտեց, որ պահը հասած է դարմանելու հիւսիսային ճակատին վրայ յառաջացած իրավիճակը եւ դիմակայելու Իրանը: Կանցի համաձայն, կառավարութիւնը ուշացած է զբաղելու լիբանանեան ճակատով եւ սխալ գործած է շատ բնակիչներ հեռացնելով շրջանի բնակավայրերէն: Իսկ իսրայէլեան զինուած ուժերու սպայակոյտի պետ զօրավար Հըրցի Հալեւի անդրադարձաւ Նահարիա քաղաքին մէջ բնակելի շէնքի մը թիրախաւորումին, զայն համարելով Հըզպալլայի կողմէ վտանգաւոր քայլ: «Բանակը ունի հիւսիսի մէջ շարժելու պատրաստ ծրագրեր», ըսաւ Հալեւի: Վարչապետ Պենիամին Նեթանիահու նախապէս յայտնած էր, թէ կառավարութիւնը կանաչ լոյս տուած է իսրայէլեան բանակի ծրագրերուն:
Իսկ Հըզպալլայի ընդհանուր քարտուղարի տեղակալ շէյխ Նաիմ Քասէմ շեշտեց, որ իսրայէլացիները պիտի չկարենան վերադառնալ Լիբանանի հետ սահմանային իրենց բնակավայրերը եթէ չդադրի Կազայի դէմ յարձակումը:
