Վարչապետի պաշտօնակատար Նեժիպ Միքաթի ՄԱԿ-ի Ապահովութեան խորհուրդէն պահանջեց աւելի գործնական եւ վճռորոշ քայլերու ձեռնարկել՝ վերջ տալու համար լիբանանցի քաղաքացիներուն դէմ իսրայէլեան ամէնօրեայ յարձակումներուն: «Ապահովութեան խորհուրդը պէտք անյապաղ շարժի՝ պաշտպանելու համար քաղաքացիական անվտանգութեան ծառայողները, որոնք առաւելագոյն ջանք կը թափեն՝ թեթեւցնելու քաղաքացիներուն տառապանքը», յայտնեց Միքաթի վարչապետարանէն, ուր տեսակցեցաւ Ապահովութեան խորհուրդի անդամ պետութիւններու դեսպաններուն եւ հիւպատոսներուն, ինչպէս նաեւ Լիբանանի մէջ միջազգային կազմակերպութիւններու ներկայացուցիչներուն հետ, ներկայութեամբ լիբանանցի նախարարներու: Ան խստիւ դատապարտեց իսրայէլեան թշնամական արարքները եւ զանոնք համարեց միջազգային օրինականութեան բացայայտ խախտում եւ լիբանանցիներու անվտանգութեան սպառնալիք: Միքաթի դեսպաններուն միջոցաւ անոնց պետութիւներուն շնորհակալութիւն յայտնեց ԵՈՒՆԻՖԻԼ-ի խաղաղապահ ուժերու առաքելութեան երկարաձգումը վաւերացնելու համար եւ պահանջեց պատժել անոնք, որոնք պատասխանատու են քաղաքացիներու թիրախաւորումին: «Լիբանան յանձնառու կը մնայ խաղաղութեան, կայունութեան եւ ժողովուրդի պաշտպանութեան», ըսաւ վարչապետի պաշտօնակտարը, կարեւորելով միջազգային համագործակցութիւնն ու աջակցութիւնը՝ տարածաշրջանին մէջ երկարատեւ կայունութիւն հաստատելու ջանքերուն:
Իսկ արտաքին գործերու նախարարի պաշտօնակատար Ապտալլա Պու Հապիպ դեսպաններուն հետ հանդիպումէն ետք յիշեցուց, թէ շտապ օգնութեան խմբակներուն եւ լրագրողներուն թիրախաւորումը կը համարուի ժընեւեան ուխտի բացայայտ խախտում: Պու Հապիպի համաձայն, անհրաժեշտ է այսուհետեւ վերջ տալ մագլցումէ խուսափելու կոչերուն եւ պահանջել ամբողջական զինադադար: «Այդ առնչութեամբ որեւէ համաձայնութիւն պիտի ըլլայ նոր առաջարկ մը եւ Լիբանանի պետութիւնը ունի զայն ընդունելու կամ մերժելու իրաւասութիւնը, ոչ թէ Հըզպալլան», շեշտեց Պու Հապիպ:
