ՄԱԿ-ի մէջ Ռուսիոյ մնայուն ներկայացուցիչի տեղակալ Տմիթրի Փոլինսքին հաստատեց, որ Իսրայէլ Համասի հետ գերիներու փոխանակման բանակցութիւնները եւ հրադադարը կ’օգտագործէ իբրեւ ծխածածկոյթ Կազայի մէջ շարունակուող պատերազմը քօղարկելու համար: Ան մատնանշեց, որ ՄԱԿ-ի Անվտանգութեան խորհուրդի նիստին Մերձաւոր Արեւելքի օրակարգին հարցով բոլորին համար յստակ է, որ Կազայի մէջ իսրայէլեան գործողութեան իւրաքանչիւր նոր օրուան հետ գերիներու ողջ մնալու հնարաւորութիւնները աւելի կը նուազին: Փոլինսքի նկատեց, որ Անվտանգութեան խորհուրդը միասնական է ու գիտակից, որ իսրայէլացի եւ օտարերկրեայ ողջ մնացած գերիները ռազմական ճանապարհով ազատ արձակելը գրեթէ անկարելի է, եւ բանակցութիւններէն զատ այլընտրանք չկայ: Իսրայէլի կառավարութիւնը լաւատեղեակ է այս մասին, ընդգծելով, որ բանակցութիւնները պարզապէս ծխածածկոյթ են միջազգային ընտանիքին ուշադրութիւնը շեղելու համար Պաղեստինի հիմնախնդիրի հիմնարար լուծումէն: Փոլինսքին ըսաւ, որ ասիկա կը ստիպէ Անվտանգութեան խորհուրդի գրեթէ բոլոր անդամները գործել ՄԱԿ-ի կանոնադրութեան համաձայն եւ կը ստիպէ երկիրները գործադրել Խորհուրդին որոշումները: «Մեզի միայն քաղաքական կամք եւ միասնութիւն պէտք է այս հարցին մէջ: Ցաւ ի սիրտ, մեր ամերիկացի գործընկերները, որոնք կը շարունակեն քօղարկել Իսրայէլի գործողութիւնները, անոնց զէնք կը մատակարարեն: Այսպիսով անոնք կը խրախուսեն Իսրայէլը շարունակել իր ռազմական գործողութիւնը Կազայի մէջ», ըսաւ ան:
