Իրանի «Թասնիմ» լրատու գործակալութիւնը վերստին անդրադարձաւ Հայաստանի Սիւնիք մարզով Ատրպէյճան-Նախիջեւան ցամաքային ուղիղ կապ ստեղծելու ենթադրեալ ծրագրերուն: Այդ նիւթին մասին խօսած էր նաեւ Ռուսիոյ արտաքին գործերու նախարար Սերկէյ Լաւրով, որ հայկական կողմը ամբաստանած էր «Զանգեզուրի միջանցքի» գործադրութիւնը խափանելու մէջ: Ըստ «Թասնիմ» գործակալութեան, իրանցի բարձրաստիճան պաշտօնեաներ ռուս, հայ եւ ատրպէյճանցի պաշտօնատարներու յայտնած են, որ Թեհրան համաձայն չէ նշեալ միջանցքի բացումին, որովհետեւ այդ աշխարհաքաղաքական փոփոխութիւններ պիտի բերէ սահմանին ու տարածաշրջանին:
