Համասի բարձրաստիճան պատասխանատուներէն Ուսամա Համտան յայտնեց, որ գերիներու փոխանակումին հարցով նորութիւններ չկան, իսկ Համաս նկատի կ’առնէ միայն միջնորդներէն ստացած առաջարկները: Համտան Ուաշինկթընը ամբաստանեց Իսրայէլի կառավարութեան նկատմամբ բաւարար ճնշում չբանեցնելու մէջ, վերահաստատելով որ Համաս բացարձակապէս կը մերժէ Կազա-Եգիպտոս սահմանային Ֆիլատելֆիա ճակատին վրայ իսրայէլեան ներկայութիւնը: Միւս կողմէ, իսրայէլեան Մոսատի ղեկավարը միջնորդներուն տեղեկացուցած է, որ իրենք կը համաձայնին Ֆիլատելֆիա գիծէն քաշուիլ միայն զինադադարի համաձայնութեան երկրորդ փուլին:
Սակայն, Կազայի մէջ զինադադար յայտարարելու բանակցային հոլովոյթը խափանուած կը մնայ ոչ միայն Համաս-Իսրայէլ տարակարծութիւններուն, այլեւ ներիսրայէլեան լարուածութեան պատճառով: Իսրայէլի ազգային անվտանգութեան հարցերու նախարար Իթմար Պեն Ղաֆիր յայտնեց, որ աշխատանք կը տանի Համասի հետ քանակցութիւնները դադրեցնելու ուղղութեամբ, «որովհետեւ կարելի չէ բանակցիլ ոճրագործներու հետ»: Ըստ նախարարին, մահացած գերիներ ունեցող պետութիւն մը պէտք չէ բանակցի, այլ պէտք է անյապաղ դադրեցնէ հաղորդակցութիւնը Համասի հետ: Իսկ պաշտպանութեան նախարար Եոաւ Կալանթ շեշտեց «Այսրյորդանանի մէջ ահաբեկչական բոլոր կազմակերպութիւնները կործանելու» անհրաժեշտութիւնը: Բազմաթիւ իսրայէլացիները սակայն համաձայն չեն ծայրայեղական երկու նախարարներու առաջարկներուն հետ եւ վարչապետ Պենիամին Նեթանիահուէն կը պահանջեն անյապաղ վերջ տալ պատերազմին եւ տուն վերադարձնել իրենց զաւակները: Անոնք, սակայն, մտահոգութիւն յայտնեցին իրավիճակի որեւէ փոփոխութիւն մերժող Նեթանիահուի քաղաքականութեան նկատմամբ:
Իսկ Միացեալ Նահանգներու Արդարադատութեան նախարարութիւնը նոր պատժամիջոցներ սահմանեց Համասի քաղաքական գրասենեակի նախագահ Եահիա Սընուարին եւ այլ համասականներու նկատմամբ՝ անցեալ տարուայ 7 Հոկտեմբերի յարձակումին մէջ պատասխանատու դեր խաղալու յանցանքով:
