Պաշտօնական Պաքուն այսօր, ըստ էութեան, մերժեց Երեւանի վերջին առաջարկը՝ ստորագրել խաղաղութեան համաձայնագրի այն յօդուածները, որոնք արդէն համաձայնեցուած էին, միւսներուն քննարկումը թողելով ապագային։ Ատրպէյճանի արտաքին գործերու նախարար Ճէյհուն Պայրամովը հայկական կողմին խորհուրդ տուաւ աւելի լուրջ մօտենալ հարցին։
Ատրպէյճանի արտաքին քաղաքական գերատեսչութեան ղեկավարը այսօր եւս պնդած է Հայաստանի Սահմանադրութիւնը փոխելու պահանջը, ինչպէս նաեւ կրկնած՝ Երեւանը «ուժգին կը զինուի», ինչ որ, ըստ անոր, կը խոչընդոտէ տարածաշրջանին մէջ խաղաղութեան վերականգնման։
Երէկ նման յայտարարութիւն ըրած էր նաեւ Ատրպէյճանի նախագահին օգնականը։ Մէկ քայլ առաջ երթալով՝ Հիքմեթ Հաճիեւը զուգահեռներ կատարած էր Հայաստանի ու Իրաքի միջեւ եւ պնդած, թէ պէտք է «սահմանափակումներ կիրառուին Հայաստանի ռազմական կարողութիւններուն նկատմամբ»:
Պայրամով յայտարարած է նաեւ, թէ անտեղի են Հայաստանի եւ Ատրպէյճանի սահմանադրութիւններուն համեմատութիւններուն փորձերը, եւ պնդած է, թէ Ատրպէյճանի մայր օրէնքին մէջ որեւէ հարեւան պետութեան, ընդ որում Հայաստանի նկատմամբ, տարածքային յաւակնութիւններ չկան:
