Հոլիուտեան աստղեր Ճորճ Քլունի եւ Պրետ Փիթ Վենետիկի ճաշարաններէն մէկը այցելելու ժամանակ որոշած են «փոխարինել» մատուցողներուն:
Դերասանները իրենց սիրելի կանանց՝ 46-ամեայ Ամալ Քլունիի եւ 34-ամեայ Ինես տէ Ռամոնի հետ այցելած են Ristorante Da Ivo ճաշարան: Այդ տեղի ունեցած է Վենետիկի միջազգային ֆիլմի փառատօնին անոնց նոր՝ «Wolfs» ֆիլմի առաջին ցուցադրութենէն մէկ օր առաջ:
Դերասանները լուրջ վերաբերած են իրենց գործին, մօտեցած են սեղաններուն, ներկայացուցած են ճաշացանկը, պատուէրներ արձանագրած ու կատակներ ըրած են:
«Ճորճը մօտ կէս ժամ ստանձնած էր ճաշաանի կառավարումը։ Ան կը շրջէր բոլոր սեղաններուն մօտով՝ ձեւացնելով, թէ կ’ընդունի պատուէրները: Ճաշացանկը իւրաքանչիւր ճաշատեսակի համար բարդ եւ երկար բացատրութիւն ունէր, բայց Ճորճը իւրովի կը մեկնաբանէր գրուածը, ինչ որ չափազանց զուարճալի էր: Ան բոլորիս ստիպեց ծիծաղիլ: Օ՜, եւ, ի դէպ, անոր կողքին Պրետ Փիթն էր»,- «People»-ին ըսած է ճաշարանի յաճախորդներէն մէկը:
