Ուժանիւթի եւ ջուրի հարցերու նախարարի պաշտօնակատար Ուալիտ Ֆայյատ յայտնեց, որ 30 հազար թոն վառելանիւթ փոխադրող նաւ մը երէկ հասած է Լիբանան, հետեւաբար այսուհետեւ կարելի է քաղաքացիներուն 4-էն 6 ժամ ելեկտրականութիւն մատակարարել:
Ֆայյատ երէկ ստորագրեց Արեւային ուժանիւթի միջազգային գործակալութեան (ISA) միանալու համաձայնութիւնը, ներկայութեամբ Լիբանանի մէջ Հնդկաստանի դեսպանին: Ֆայյատ յայտնեց, որ այս համաձայնութեան ստորագրումը կը համարուի Լիբանանի ուժանիւթային պատմութեան մէջ անկիւնադարձ մը դէպի կառավարելի, կայուն միջոցներու գործածութիւն, նկատի առնելով երկրին ելեկտրական պէտքերը եւ սահմանափակումները: «Այս մաս կը կազմէ մեր ազգային ռազմավարութեան եւ կը միտի ապագային ապահովել ուժանիւթի աւելի յարմար միջոցներ», ըսաւ նախարարի պաշտօնակատարը: Այս առումով, Լիբանան պիտի փորձէ մինչեւ 2030 թուական ելեկտրականութեան 30 առ հարիւրը արտադրել կառավարելի միջոցներով, իսկ շարք մը նախաձեռնութիւններ պիտի յայտարարուին «Պէյրութի ուժանիւթային շաբաթ» համագումարին ընթացքին, որ տեղի պիտի ունենայ 18-20 Սեպտեմբերին:
