Լիբանանի մէջ թափանցիկութեան եւրոպական դիտարանը ահազանգեց, թէ լիբանանեան շուկաներուն մէջ սակագիներու ուռճացումը կը շարունակուի, թէեւ ամերիկեան տոլարին փոխարժէքը տարի մը շարունակ անփոփոխ կը մնայ 90 հազար լիրայի շուրջ: Ըստ դիտարանին, Լիբանան կը տատանի ամբողջական անկումէն խուսափելու եւ ամբողջական վերականգնումի անկարողութեան միջեւ, մինչ պետութիւնը, Կեդրոնական դրամատունն ու վաճառական դրամատուները կը շարունակեն փոխանակել ամբաստանութիւններ՝ անփոփոխ պահելով ներկայի ձգտուած վիճակը: «Տնտեսութեան անիւը վերստին շարժելու գլխաւոր միջոցը կը կայանայ արմատական բարեկարգումներու իրականացումին եւ վնասներուն ծաւալը արժեւորելու մէջ», յայտարարեց Թափանցիկութեան եւրոպական դիտարանը:
Իսկ ելեւմտական վարկանշային Standard and Poor’s գործակալութիւնը կանխատեսեց, որ լիբանանեան լիրային սուր արժեզրկումը շարունակուի յառաջիկայ տարիներուն: Ամերիկեան տոլարի փոխարժէքի համեմատական կայունութեան հանդերձ, ի տես Լիբանանի դիմագրաւած տնտեսական բազում մարտահրաւէրներուն եւ լուծումներու բացակայութեան, գործակալութիւնը եզրակացուց, որ ամերիկեան տոլարին փոխարժէքը 2025-ին կրնայ հասնիլ 115 հազարի, ապա 2026-ին բարձրանայ 136-ի, ի վերջոյ 2027-ին հասնելով 152 հազար լիրայի:
