Պաշտպանութեան նախարար Սուրէն Պապիկեան ընդունած է Հայաստանի մէջ Ֆրանսայի դեսպան Օլիվիէ Տըքոթինյին, քննարկած է պաշտպանութեան բնագաւառին մէջ Հայաստան-Ֆրանսա համագործակցութեան ներկայիս ընթացքին եւ յառաջիկայ ծրագրերուն առնչուող հարցեր։
Ըստ Հայաստանի ռազմական գերատեսչութեան՝ քննարկումները, մասնաւորապէս, վերաբերած են ՀՀ զինուած ուժերուն մէջ տեղի ունեցող բարեփոխումներուն ու անոնց շրջանակին մէջ Ֆրանսայի հետ համագործակցութեան ծրագրերուն։
Հանդիպման մասին Պապիկեանը նաեւ X-ի մ էջ գրառում կատարած եւ լուսանկարներ հրապարակած է։
Հայաստանն ու Ֆրանսան անցեալ տարի Հոկտեմբերին ռազմական ոլորտին մէջ համագործակցութեան մասին պայմանագրեր ստորագրած են, որոնցով Ֆրանսան Հայաստանին պէտք է ռատարներ եւ հրթիռներ տրամադրէ, խորհրդատուութիւն՝ բանակի բարեփոխումներու հարցով։
Պաքուն ալ մեղադրած է Փարիզը՝ «հարաւային Կովկասի մէջ կայունութիւնը խաթարելու», «միակողմանի մօտեցման ու հայամէտ դիրքորոշման» «Հայաստանը զինելու» համար՝ փաստացի պոյքոթելով Ֆրանսայի մասնակցութեամբ բանակցային բոլոր հանդիպումները։ Երեւանն ու Փարիզը պարբերաբար կը շեշտեն՝ Ֆրանսան Հայաստանին միայն պաշտպանական սարքաւորումներ կը տրամադրէ։
Պաշտօնական երեւանը յայտարարած է, որ պիտի շարունակէ պաշտպանական զէնք գնել՝ անկախ թէ խաղաղութեան պայմանագիր կնքելէ յետոյ ինչ անվտանգային իրավիճակ պիտի ըլլայ։ Փետրուար 23-ին Հայաստանը արդէն ստացած է պաշտպանական սարքաւորումներու առաջին խմբաքանակը։
