ՀԱՊԿ-ի շրջանակներուն մէջ Հայաստանի առջեւ դրուած պարտաւորութիւնները կը մնան անփոփոխ, հանրապետութեան համար կայունութեան այլընտրանքային երաշխաւորներ չկան՝ բացի ՀԱՊԿ-էն եւ Ռուսաստանէն: Այս մասին ըսած է ՌԴ ԱԳՆ ԱՊՀ երկիրներու առաջին բաժնի տնօրէն Միքայէլ Աղասանդեանը։
«Ինչ կը վերաբերի Հայաստանի մասնակցութեան ՀԱՊԿ-ի ընդհանուր աշխատանքներուն, ապա այժմ Երեւանի մէջ գերակշռող գիծը նման փոխգործակցութենէն հեռանալն է: Այս դիրքորոշումը, ինչպէս նկատելի է, կը հակասէ Հայաստանի ժողովուրդի շահերուն, էապէս կը թուլացնէ ազգային անվտանգութիւնը: Վերջին հաշուով ՀԱՊԿ-ին եւ Ռուսաստանին այլընտրանքներ գոյութիւն չունին՝ որպէս հանրապետութեան կայունութեան երաշխաւորներ: Կազմակերպութեան շրջանակներուն մէջ փոխադարձ պարտաւորութիւնները կը մնան անփոփոխ»,- յայտնած է Աղասանդեանը։
Ան յաւելած է, որ ՀԱՊԿ-ի մէջ լիարժէք համագործակցութեան վերադառնալու դռները Հայաստանի համար բաց են։
«Յոյսով ենք, որ հայ գործընկերները, յաղթահարելով կասկածները, կրկին հաւատարմութիւն կը ցուցաբերեն շահագրգիռ համատեղ աշխատանքին՝ ելլելով բարեկամ հայ ժողովուրդին ռազմավարական շահերէն»,- ըսած է դիւանագէտը։
