Եւրոպայի մինչև 10 տարեկան պատանիներու արագ ճատրակի խմբային ախոյեանութեան աւարտին, Հայաստան 10 կէտով գրաւեց ընդհանուր դասաւորման 3-րդ հորիզոնականը՝ դառնալով պրոնզէ մետալակիր: Առաջին դիրքը 12 միաւորով գրաւեց Սպանիոյ պատանեկան խումբը, իսկ արծաթին տիրացան քւքրանացիները՝ ապահովելով 11 կէտ:

Հայաստան ներկայացաւ հետեւեալ պատանի վարպետներով՝

Դաւիթ Մելքոնեաը      2 յ        3 հ       2 պ

Աշոտ Աւետիսեան      5 յ        2 հ       0 պ

Արմէն Վարդանեան   5 յ        1 հ       1 պ

Սլաւա Կոնճորեան     2 յ        0 հ       3 պ

 

 

WTA- ԹԵՆԻՍ: ԷԼԻՆԱ ԱՒԱՆԷՍԵԱՆ ԱՌԱՋԻՆ ԱՆԳԱՄ ԸԼԼԱԼՈՎ` 51-ՐԴ

 

Թենիսի կանանց միութիւնը հրապարակեց համաշխարհային դասակարգման շաբաթօրեայ աղիւսակը։ Հայաստանի ներկայացուցիչ Էլինա Աւանէսեանը յառաջադիմած է 9 աստիճանով եւ առաջին անգամ ըլլալով գրաւած է 51-րդ հորիզոնականը։

ԱՄՆ-ի Սինսինաթի քաղաքին մէջ տեղի ունեցած WTA-1000 մրցաշարքի երկրորդ փուլին Էլինա Աւանէսեանը պարտութեան մատնած էր աշխարհի 10-րդ դիրքը զբաղեցնող, Լաթվիոյ ներկայացուցիչ էլէնա Օսթապենքօն։ Երրորդ փուլին Էլինան պարտութիւն կրեց աշխարհի 16-րդ՝ ռուսաստանցի Լիւտմիլա Սամսոնովայէն։

Սինսինաթիի մրցաշարքի յաղթող, Պելառուսիոյ ներկայացուցիչ Արինա Սապալենքան բարձրացաւ երկրորդ հորիզոնական՝ շրջանցելով ամերիկացի Կորի Կաուֆին։ Առաջատարը լեհ Իքա Շվիոնթեքն է։

WTA, 20 Օգոստոս

1 (1). Իքա Շվիոնթեք (Լեհաստան)՝ 10695 միաւոր
2 (3). Արինա Սապալենքա (Պելառուս)՝ 8016
3 (2). Կորի Կաուֆ (ԱՄՆ)՝ 6743
4 (4). Էլենա Ռիփաքինա (Ղազախստան)՝ 5931
5 (5). Եասմին Փաուլինի (Իտալիա)՝ 5168
51 (60). Էլինա Աւանէսեան (Հայաստան)՝ 1141

 

 

ԱՍԻՈՅ ՊԱՍՔԵԹՊՈԼԻ «ՍՈՒՓԸՐ» ՄՐՑԱՇԱՐՔ

Պասքեթպոլի Ասիոյ ֆետերասիոնը հրապարակեց Արեւմտեան Ասիոյ պասքեթպոլի «Սուփըր» մրցաշարքի (WASL) 2024-2025 եղանակին մանակցող խումբերուն ցանկը: Մրցումները պիտի սկսին Սեպտեմբերի վերջին շաբաթը: Նշենք, որ WASL-ի 2023-2024 եղանակի ախոյեանն է Պէյրութի «Ռիատի» ակումբը:

 

Ա. Արեւմտեան Ասիոյ գօտի

 

– Ռիատի (Լիբանան)

– Սաժես (Լիբանան)

– Թապիաթ (Իրան)

– Տիֆաա ալ-Ժաուի (Իրաք)

– Ուահտէ (Սուրիա)

– Ամման Եունայթըտ (Յորդանան)

– Յաւելեալ երկու խումբ, որոնց ինքնութիւնը պիտի յստականայ շուտով

 

բ. Ծոցի գօտի.

 

– Մանամա (Պահրէյն)

– Քուէյթ (Քուէյթ)

– Քատիսիա (Քուէյթ)

– Իթթիհատ Ժետտա (Սէուտական Արաբիա)

– Շապապ ալ-Ահլի (Ա. Մ. Էմիրութիւններ)

– Պէշէիր (Օման)

– Արապի (Քաթար)

– Յաւելեալ խումբ մը, որուն ինքնութիւնը պիտի յստականայ շուտով

 

 

ԿՈՒՆՏՈՂԱՆԸ ԿԸ ՀՐԱԺԱՐԻ ՄԻՋԱԶԳԱՅԻՆ ՖՈՒԹՊՈԼԷՆ

Գերմանացի կիսապաշտպան Իլքէյ Կունտողան, որ անցեալ տարեշրջանին «Մանչեսթըր Սիթի»էն միացաւ «Պարսելոնա» ակումբին, Երկուշաբթի օր յայտարարեց, որ մտադիր է հեռանալ միջազգային ֆութպոլէն:

33-ամեայ կիսապաշտպանը իր ասպարէզի նորամուտը արձանագրած է Գերմանիոյ մէջ 2011 թուականին եւ ազգային խումբին շապիկով հանդէս եկած է 82 անգամ, դառնալով 19 կոլի հեղինակ:

«Քանի մը շաբաթ մտածելէ ետք, ես հասած եմ այն ​​եզրակացութեան, որ ժամանակն է աւարտելու իմ ազգային խմբային ասպարէզս»,- գրած է Կունտողանը ընկերային ցանցին վրայ։

 

UEFA Champions League

ՈՒԵՖԱ-Ի ԶՏՄԱՆ ՄՐՑՈՒՄՆԵՐ

Երէկ երէկոյեան ընթացք առին ՈՒԵՖԱ-ի ախոյեանութեան զտման փուլի երթի մրցումները: Այսօր խաղերը կը շարունակուին հետեւեալ հերթականութեամբ՝

Եանկ Պօյզ X  Կալաթասարայ

Միթժիլենտ X  Պրաթիսլաւիա

Տինամօ Քիեւ X  Սալզպըրկ

Մալմօ X Սբարտա Փրակա

 

 

ԼԻԲԱՆԱՆԻ ԿԱՆԱՆՑ ՊԱՍՔԵԹՊՈԼԻ ԿԱԶՄԸ ԿԸ ԶԻՋԻ ՌՈՒԱՆՏԱՅԻ ԴԷՄ

 

Լիբանանի կանանց ազգային հաւաքականը 2026 թուականի աշխարհի ախոյեանութեան զտումի մրցումներու ծիրէն ներս 62 – 80 արդիւնքով պարտութիւն մը կրեց հիւրընկալ երկրի հաւաքականէն:

Չորս «ռաունտ»երու ընթացքին արձանագրուեցաւ հետեւեալ արդիւնքները՝ 17-24,  19-21, 12-20 եւ 14-15։ Լիբանանի կազմին լաւագոյն ռմբարկուներն էին Ռեպեքա Աքըլը (15 միաւոր) եւ Պելլա Մուրիկաթէթին (26 միաւոր):

Վաղը դժուարին հանդիպում մը կը սպասուի Լիբանանի կանանց համար Անգլիոյ կազմին դէմ: Ի դէպ վերջինս 47-53 արդիւնքով պարտութիւն մը կրած էր Արժանթինի հաւաքականէն։ Ուրբաթ օրը Լիբանանի կանանց հաւաքականը իր ուժերը պիտի չափէ աւելի հզօր՝ Արժանթինի հետ։

Մրցաշարքին կը մասնակցին 8 հաւաքականներ՝ բաժնուած երկու խմբակներու. առաջինինը կ’ընդգրկէ հիւրընկալող Ռուանտան, Անգլիան, Լիբանանը եւ Արժանթինը, իսկ երկրորդը՝ Պրազիլիան, Հունգարիան, Սենեկալը եւ Ֆիլիփինը։

ՆԱՐԵԿ ԳՐԻԳՈՐԵԱՆԸ՝ ԸՄԲՇԱՄԱՐՏԻ Մ17 ԱԱ-Ի ՊՐՈՆԶԷ ՄԵՏԱԼԱԿԻՐ

Յունահռոմէական ոճի ըմբշամարտի մինչեւ 17 տարեկաններու հաւաքականի ներկայացուցիչ, 65 քկ քաշային Նարեկ Գրիգորեանը Յորդանանի մէջ ընթացքող Մ17 տարեկաններու աշխարհի ախոյեանութեան պրոնզէ մետալ նուաճած է։

Պրոնզէ մետալի համար գօտեմարտին ան յաղթեց Ուզպեքիստանի ներկայացուցիչին։

Յունահռոմէական ոճի ըմբշամարտի մինչեւ 17 տարեկաններու հաւաքականի միւս ներկայացուցիչը՝ 55 քկ քաշային Եուրիկ Մխիթարեանը նոյն ախոյեանութեան եւս պրոնզէ մետալ նուաճած է։

Լյովա Շուխեանը պարտուեցաւ կիսաւարտական մրցումին եւ պիտի պայքարի պրոնզէ մետալի համար։

 

ՍՈՖԻԱ ԲԱՂՐԱՄԵԱՆԸ՝ ԵՒՐՈՊԱՅԻ ՄԻՆՉԵՒ 8 ՏԱՐԵԿԱՆ ԱՂՋԻԿՆԵՐՈՒ ԿԱՅԾԱԿՆԱՅԻՆ ՃԱՏՐԱԿԻ ԱԽՈՅԵԱՆ

Սոֆիա Բաղրամեանը դարձաւ Եւրոպայի մինչեւ 8 տարեկան աղջիկներու կայծակնային ճատրակի ախոյեան։

Սոֆիան 18 հնարաւորէն վաստակեց 16 միաւոր եւ կիսեց 1-2-րդ հորիզոնականները՝ յաւելեալ ցուցանիշերով զբաղեցնելով առաջին հորիզոնականը: